Prosesu rekrutamentu PAM Dili iha hela faze auditoria
DILI, 06 Jullu 2025 (TATOLI)—Ministru Administrasaun Estatál (MAE), Tomas do Rosário Cabral, hateten prosesu rekrutamentu ba Prezidente Autoridade Munisípiu Dili ramata ona maibé daudaun ne’e sei he’it de’it prosesu auditória (avalaiasaun) antes submete ba Primeiru-Ministru.
Notísia Relevante: MAE rejista konkorrente na’in-sia ba konkursu PAM Dili
“Prosesu auditória remata ona mak ita foin lori proposta ba Primeiru-Ministru. Se lae prezidente autoridade ida tuan husik hela problema no prezidente autoridade foun ba kaer fali kna’ar sira bele dun malu bainhira problema ruma mosu. Entaun, ema ida-ne’ebé atu lidera Dili tenke iha vizaun planeamentu,”, Governante ne’e informa ba jornalista sira iha Sentru Konvensaun Dili (CCD, sigla portugés), sesta (04 Jullu 2025) ne’e.
Governante ne’e hateten, tanba autoridade sira iha ona podér administrativu no finanseiru signifika sira-nia osan ministériu la jere maibé sira-na’in rasik mak sei jere, tanba ne’e mak Governu presiza auditória para ida foun ne’e ba buat hotu tenke la’o tuir norma ne’ebé iha.
Prosesu auditoriu tenke liuhusi Inspetór Ministériu Administrasaun Estatál tanba la kualker atu nomeia ema, bainhira ita nomea ema ba halo auditoria ne’e kontradís ho legál ne’ebé iha.
“Ha’u ba husu beibeik ona iha inspetór no sira sei haree hela liuliu mak ezekusaun rekursu umanu ho implementasaun atividade iha territóriu munisípiu Dili nian,” nia dehan.
Notísia Relevante: Gregório Saldanha simu pose husi MAE, Prioriza área 12 durante mandatu
Tanba, nia dehan, PAM Dili sesante rezigna-aan iha loron 28 fulan-Janeiru, ne’ebé auditória ne’e tenke loloos la’ós ita ba kaer ema naran lori mai, maibé inspetór tenke responsabiliza ba auditória ne’ebé nia halo.
“Autoridade munispál sira-ne’e tutela diretamente iha Primeiru Ministru, ne’ebé prosesu ninia ne’e remata tiha ona ita sei halo re-kaptulasaun hafoin propoin ba Primeiru-Ministru,” nia hateten.
Maibé, antes atu lori ba Primeiru-Ministru nia tenke lori ho relatóriu auditória antigun Prezidente Autoridade Munisipal Dili nian, hodi haree auditória ne’e tenke imparsiál.
Ne’ebé, nia hateten, tuir lei tenke submete ba Primeiru-Ministru sé mak nomeia no sé mak ezonera ne’e Primeiru-Minustru mak deside.
“Atu nune’e labele mosu kazu hanesan Autoridade Munisípiu Bobonaru ne’ebe Primeiru-Ministru fó suspensaun ba nia durante fulan tolu tanba iha aktu irregularidade,” nia dehan.
Notísia Relevante: Rekizitu konkorre ba vaga PAM Dili
Jornalista : Alexandra da Costa
Editór : Cancio Ximenes
