BOBONARU, 08 Jullu 2025 (TATOLI)—Diresaun Nasionál Transporte Terrestre (DNTT) Delegasaun Territoriál Munisípiu Bobonaru, iha segunda semana kotuk, hahú emite karta ‘Guida de Marcha’ ba sidadaun Timor ne’ebé utiliza transporte atu halo viajen bá provínsia Nusa Tenggara Timur (NTT), Indonézia.
Diretór DNTT Munisípiu Bobonaru, Tomás Maia, informa Governu liuhusi Ministériu Transporte no Komunikasaun desentraliza atu administrativu ne’e bá munisípiu atu minimiza dezlokasaun komunidade bá Dili tanba implika ba kustu no tempu.
“Agora daudaun ha’u aberta ba komunidade ne’ebé hakarak asesu bá iha Guia de Marcha husi Maliana, Bobonaru, bá iha Atambua no Kupang (NTT) bele mai trata dokumentu iha edifísiu Diresaun Munisipál Transporte no Komunikasaun Bobonaru hahú ohin bá-oin,” nia informa ba jornalista sira, iha nia kna’ar fatin, segunda ne’e.
Diretór Tomás fundamenta katak karta ne’e só bele emite ba karreta privada estasiona magun, enkuantu karreta ho tipu truk no seluk tan tenke hetan lisensa husi Embaixada Indonézia.
Kritéria atu asesu Guia de Marcha, Tomás esplika, komunidade tenke aprezenta Pasaporte, Karta Kondusaun, Billete Identidade (BI), Kartaun Eleitorál, dokumentu karreta hanesan librete ka STNK no karta inspesaun.
“Dokumentu sira-ne’e tenke orijinál hotu mai para scan tiha hatama hotu bá sistema. Hafoin ida-ne’e mak aprezenta karreta nia kondisaun ba ofisiál funsionáriu sira sei halo inspesaun ba karreta nia kondisaun mak foin bele bá,” nia haktuir.
Entretantu, abitante Maliana, Aleixo Correia de Jesus, kontente no agradese ba Govenu tanba hakbesik servisu ne’e mai ona iha baze.
“Uluk ami atu trata dokumentu ne’e tenke bá Dili loron ida ka rua. Soe tempu no gasta osan tiha mak foin bele tama bá Indonézia. Agora mai ona munisípiu ne’e fasilita ona ami para asesu besik,” nia informa.
Enkuantu, Guia de Marcha ne’e emite ba tempu prazu dezlokasaun semana ida selu taxa $5, semana rua $10 no fulan tolu $40.
Jornalista: Sergio da Cruz
Editór: Xisto Freitas Piedade
