BOBONARU 18 Jullu 2025 (TATOLI)—Grupu tolu iha Aldeia Korluli, Suku Ritabou, Postu Administrativu Maliana, Munisípiu Bobonaru asesu ona fundu impréstimu husi Ministériu Dezenvolvimentu Rurál no Abitasaun Komunitária (MDRHC-sigla portugeza) hodi investe iha área pekuária no peska liuhusi atividade haki’ak fahi-rasa, manu-broiler no ikan-nila.
Funsionáriu Fasilitadór MDRHC destakadu iha Aldeia Korluli, Damião António Ximenes haktuir katak bazeia ba monitorizasaun durante ne’e nota katak atividade husi grupu tolu ne’e kuaze la’o hotu ona no grupu ida iha ona rezultadu.
“Grupu haki’ak manu-broiler kolleta ona dala-rua no besik ba dala-tolu ona,” nia informa ba jornalista sira iha nia kna’ar fatin, Sesta ne’e.
Iha parte seluk, Xefe Grupu Haburas, Simão Cardoso Soares konsidera programa dezenvolvimentu rurál di’ak tebes tanba intensaun hamatak rai iha Aldeia Korluli.
Nia argumenta maski grupu ne’e foin aprende haki’ak fahi-rasa, manu-broiler no ikan-nila maibé fiar katak bá-oin liuhusi atividade ne’e sei bele hetan rendimentu di’ak hodi kontinua sustenta atividade grupu no família.
“Ami-nia grupu ne’e iha membru 18. Intensaun harii grupu ne’e atu responde nesesidade merkadu. Tanba ne’e mak ami koko haki’ak fahi-rasa, manu-broiler no ikan-nila,” Simão informa.
Nia subliña katak programa ne’e benifísia grupu tanba grupu rasik mak halo jestaun ba nia orsamentu.
Totál orsamentu ne’ebé Ministériu Dezenvolvimentu Rurál no Abitasaun Komunitária oferese ba grupu tolu ne’e hamutuk rihun $50.
Jornalista: Sergio da Cruz
Editór: Xisto Freitas da Piedade
