DILI, 21 Jullu 2025 (TATOLI)–Treinadór ekipa Voleiból Praia Timor-Leste rekoñese atleta timoroan lakon iha loron dahuluk tanba fraku mentalidade iha kampu.
“Jogu desportivu Komunidade País Lian Portugés (CPLP, sigla portugés) ne’e hanesan buat foun ida ba sira, entaun halo sira fraku iha mentalidade maibé ekipa nafatin motiva no esforsu hodi hasoru jogu ida-ne’e,” Treinadór ekipa feto Timor-Leste ba modalidade Voleiból Praia, Feliciano da Costa Soares, hato’o ba Ajénsia TATOLI, iha Kampu Voleiból Praia, Bidau-Lesidere, Segunda ne’e.
Nia promete katak ba-oin sei hadi’a di’ak liután mentalidade atleta sira liuhusi formasaun no kompetisaun ruma.
“Ba-oin buat ne’ebe mak falla ita presiza hadi’a di’ak liután iha parte mentalidade liuhusi formasaun no kompetisaun barak atubele aumenta tan sira-nia koñesimentu,” nia subliña.
Notísia relevante : Voleiból praia : ekipa feto Portugal manán set rua kontra Timor-Leste
Feliciano garante katak atleta timoroan sira-ne’e sei kontinua partisipa iha jogu sira tuirmai to’o iha semi-finál.
“Iha esperansa no ita garante katak ita-nia atleta timoroan sira-ne’e sei kontinua partisipa iha jogu tuirmai to’o iha semi-finál ni’an,” nia dehan.
Iha sorin seluk, Koordenadór Voleiból Praia Timor-Leste, Mário Bento Soares de Sousa informa katak kona-ba preparasaun antes ne’e federasaun fó ba klube idak-idak prepara maibé to’o fali jogu ne’e besik laiha ema ida prepara.
“Antes ne’e Governu la tau buat ida. Soké, atu tama ona ba preparasaun fulan tolu mak Governu konsentra ami iha Otél Ramelau,” nia haktuir.
Tuir Mário katak antes ne’e mós Governu laiha preparasaun di’ak tanba laiha selesaun entre atleta sira.
Nia esplika katak husi dahuluk jogu voleiból ne’e, Timor-leste lakon maibé ohin bele ultrapasa ona.
“Horisehik ita derrota maibé ohin ita manán husi parte ekipa femenina no maskulinu, nune’e ita sente kontente tebes. Ita sei tama bá iha kuartu finál,” Mário tenik.
Nia sujere ba atleta timoroan sira atu prepara aan di’ak liután nune’e bele kontinua partisipa iha eventu voleiból ne’e.
Nia hatutan, antes ne’e, totál atleta voleiból hamutuk na’in-hitu kompostu husi feto tolu no mane na’in-haat no depois halo selesaun hetan ekipa rua de’it (ekipa prinsipál ida ho suplente ida).
Jornalista : Osória Marques
Editora : Julia Chatarina
