Horta rekoñese ADB apoia TL nia dezenvolvimentu infraestrutura ho kualidade aas

DILI, 21 Jullu 2025 (TATOLI)—Prezidente Repúblika, José Ramos Horta, rekoñese Banku Dezenvolvimentu Aziátiku (ADB) nia apoia ba Timor-Leste nia dezenvolvimentu infraestrutura ne’e ho kualidade aas.

“ADB hanesan parseiru di’ak ida, halo parseria ho Timor-Leste dezde 1999-2000 no kontinua to’o ohin loron. Sira-nia bolu no mandatu primáriu mak fó prioridade ba infraestrutura sira Timor-Leste nian,” Xefe Estadu hato’o ida-ne’e durante enkontru ho Prezidente ADB Masato Kanda iha Aeroportu Internasionál Nicolau Lobato, Dili, bainhira fila husi vizita traballu iha Guiné-Bissau, foin lalais.

Prezidente mós afirma katak ADB nia servisu iha setór infraestrutura iha kualidade aas.

“Servisu di’ak, servisu ho kualidade, estrada alkatraun no ponte sira-ne’ebé mak ADB mak kaer. Sira hala’o peskiza no kontrolu, no ami haree katak kualidade di’ak tebes. Estrada asfaltu sira seluk la’ós sira-nia responsabilidade, maibé sira mós monitoriza, inspesiona no peskiza sira; sira sempre garante kualidade aas,” nia dehan.

Tuir Ramos Horta, ADB nia apoiu inklui pagamentu infraestrutura tomak no empréstimu ba Governu Timor-Leste ba dezenvolvimentu infraestrutura.

Iha fatin hanesan, Prezidente ADB Masato Kanda mós afirma katak Timor-Leste no ADB nu’udar parseiru kuaze tinan 20 ona, partikularmente ADB nia prioridade nu’udár Banku Rejionál iha setór infraestrutura.

“Iha tinan barak nia laran, BAD fó ona empréstimu ho prazu badak hodi halo estrada nasionál sira no asesu rurál. No agora projetu boot liu mak projetu Aeroportu Internasionál Nicolau Lobato, ho investimentu husi Japaun ho Austrália,” nia hateten.

Hanesan relata tiha ona, kontratu sira asina ona ho konsultór sira no ADB hala’o hela estudu viabilidade no estudu tékniku sira, hamutuk ho apoiu husi Japaun no Austrália, hodi halo ida-ne’e sai projetu boot ida ba parseiru na’in-tolu.

Jornalista : Hortencio Sanchez

Editór        : Cancio Ximenes