DILI, 22 Jullu 2025 (TATOLI)—Selesaun portugueza futeból nian empata 0-0 ho nia adversáriu Angola iha kontinuasaun Jogu Desportivu Komunidade País Lian Portugés (CPLP, sigla portugés) ba dala-XII, Tersa kalan ne’e, iha Estádiu Munisipál Dili.
Bainhira minutu primeira parte hahú, ekipa rua lansa kedan kontra no atake ba malu tuir tékniku no abilidade.
Portugal koko halo halo atake másimu ba Angola, maibé Angola iha kapasidade ne’ebé adekuadu hodi revolta kontra, nune’e bele satán netik Portugal nia oportuniade atu prodús golu.
Minutu la’o ba minutu, jogu la’o ho ritmu ne’ebé másimu, jogadór sira fintas bola ba mai iha du’ut matak nia leten, kosar habokon kamizola ne’ebé sira hatais, maibé nunka rezulta golu tanba ekipa rua forte la diferente.
Sutu barak avansadu Angola lansa maibé sutu hirak ne’e seidauk kona iha alvu, Portugal mós lansa sutu barak maibé hetan salvasaun husi guarda rede Angola ikus la rezulta golu.
Adeptus sira iha Estádiu Munisipál Dili hamrik, tuur haleu tribun leten, la nonok, hakilar fó suporta ne’ebé másimu, adeptus hirak ne’e balun husi Timor-Leste, Angola no Cabo Verde.
Suporta husi lian wain ba wain iha tribun leten hasa’e liután espíritu ekipa rua nian iha kampu laran, nune’e to’o minutu 40 primeira parte termina laiha golu ruma akontese ba ekipa rua, nune’e ekipa rua tenke termina ho empata 0-0.
Dolar ba segunda parte ekipa rua kontinua lansa kontra atake ne’ebé maka’as liutan, maibé seidauk rezulta golu no halo ekipa rua tenke servisu maka’as liután.
Notísia relevante : Komisan deside halo mudansa ba oráriu jogu futeból
La’os de’it jogadór sira mak serbisu maka’as, maibé treinadór husi ekipa rua hamutuk ho sira nia asitente koordena malu maka’as hodi muda estratejia oinoin maibé jogadór sira mantein ho sira-nia prinsípiu la rezulta golu.
Angola domina bola iha segunda parte bainhira minutu halai to’o 50 resin, halo Portugal book-an araska atu kombate iha kampu modok nia leten, maibé ekipa Portugal nafatin iha esperansa metin hodi salva sira-nia nasaun husi atake ne’ebé Angola halo.
Nune’e, oportunidade ne’ebé Angola hetan hela de’it hanesan oportunidade no to’o minutu 80 termina rezultadu mantein 0-0 no ekipa rua tenke fahe de’it pontu ba malu.
Tuir oráriu ne’ebé iha jogu terseiriu ba ekipa sira iha loron tuir mai, Portugal sei kontra Cabo-Verde no Angola sei kontra Timor-Leste.
Tuir jogu primeiru ne’ebé hala’o ona ekipa Timor-Leste derrota ona 0-1 kontra Portugal no Angola konsege konkista ona pontu tolu hafoin manán Cabo-Verde ho rezultadu 2-0.
Husi rezultadu ne’ebé iha Angola, Portugal no Cabo-Verde sei iha oportunidade hodi hadau malu ba semi finál maibé Timor-Leste hanesan uma-na’in tenke elemina ona tanba pontu la to’o ona maski iha jogu ikus kontra Angola.
Daudaun ne’e, Cabo-Verde ho pontu tolu, Portugal pontu haat, Angola pontu haat no Timor-Leste hela ho pontu zero tanba iha jogu rua mak lakon tutuir malu.
Jornalista : Hortencio Sanchez
Editora : Julia Chatarina
