DILI, 21 Jullu 2025 (TATOLI)–Komisaun torneiu futeból XII Jogu Desportivu CPLP ba edisaun da-XII nian halo mudansa ba oráriu jogu ho objetivu atu garante tempu deskansa no rekuperasaun ne’ebé nesesáriu ba atleta sira.
Portavós Komisaun, João Campos, hateten responsável ba organizasaun kompetisaun futeból nian klarifika katak desizaun ne’e foti iha konsensu ho reprezentante sira hosi Angola, Cabo Verde, Portugál, no Timór-Leste, tuir preokupasaun sira kona-ba rítmu maka’as husi jogu sira.
“Anúnsiu ofisiál kona-ba alterasaun sira ba kalendáriu jogu nian hanesan rezultadu husi enkontru tékniku urjente ida ho reprezentante sira selesaun nian. Hotu-hotu konkorda ho unanimidade kona-ba nesesidade hodi ajusta kalendáriu, tanba jogu sira hala’o kuaze loro-loron, ne’ebé la permiti tempu sufisiente ba atleta sira hodi rekupera no deskansa,” nia esplika.
Ho mudansa ne’e, jogu entre Timor-Leste no Cabo Verde ne’ebé inisialmente marka ona ba ohin, adia ona ba aban, tersa-feira, tuku 7h00 kalan iha Estádiu Munisipál Dili. Jogu entre Portugál no Angola sei kontinua iha fatin hanesan iha tuku 9h00 kalan.
João Campos mós fó sai katak sei laiha jogu sira iha loron-kuarta, 23 Jullu, ho kompetisaun hahú fali iha loron tuir mai ho Angola hasoru Timor-Leste iha tuku 7h00 kalan no Portugál hasoru Cabo Verde iha tuku 9h00 kalan, iha Estádiu Munisipál Dili.
“Jogu ba terseiru lugar sei hala’o iha loron 26 tuku 1h00 loraik iha kampu Becora. Grande finál sei akontese iha loron hanesan tuku 4h00 lorokraik iha Estádiu Munisipál Dili,” nia hateten.
Xefe delegasaun futeból portugés nian, Rui Pedro Bragança, hatudu nia apoiu ba desizaun ne’e, tanba nia fiar katak sei la seguru ba atleta sira atu hala’o jogu sira iha loron tuituir malu.
Hanoin hanesan hato’o hosi treinadór ekipa angolana nian, Mário Catala, ne’ebé fiar katak mudansa ne’e pozitivu ba atleta sira nia saúde.
“Ha’u hanoin ida-ne’e buat di’ak ida. Labarik sira presiza deskansa. Selesaun kabu-verdianu joga horisehik hasoru selesaun angolana, no joga fali ohin sei sai todan tebes ba joven sira,” nia dehan.
Jornalista : Hortencio Sanchez
Editór : Cancio Ximenes
