DILI, 22 Jullu 2025 (TATOLI)—Iha ámbitu Jogu Desportivu Komunidade País Lian Portugés (CPLP, sigla portugés) modalidade Voleiból Praia iha loron datoluk nian, atleta mane husi Timor-Leste bainhira halo kontra-ataka ba ekipa mane Mozambike, konsege hetan totál pontu 42 – 26, nune’e ekipa Timor-Leste hakat bá semi-finál.
Set dahuluk Timor-Leste ho pontu 21, Mozambike 14, set daruak Mozambike 21 no Timor-Leste 13, set ikus Timor-Leste 21 no Mozambike 12.
Jogadór husi Timor-Leste mak Noe Siqueira no Felizberto Faria, enkuantu jogadór husi Mozambike mak Mauricio José no Arnaldo Nhantumbo.
Jogadór Timor-Leste, Noe Siqueira, hateten, aban tama iha faze semi-finál nune’e ekipa kontinua esforsu hodi gaña iha jogu ne’e.
“Ami gaña vitória dala-rua, horisehik ami gaña Angola 2a0 no ohin ami gaña tan ekipa Mozambike 2a1. Ami kontente tebes tanba ami bele gaña pul, ami gaña tanba hetan suporta másimu iha jogu ne’e. Espera aban tama semi-finál nafatin apoiu hodi tama finál,” Noe Sequeira informa ba jornalista sira, iha kampu Voleiból Praia, iha Bidau-Lesidere, Tersa ne’e.
Notísia relevante : Voleiból Praia : ekipa mane Timor-Leste hamate set rua tutuir malu hasoru Angola
Nia otimista, ekipa mane, feto no mista iha modalidade ne’e sei hetan vitória.
“Ha’u fiar no garante katak iha jogu semi-finál tantu Voleiból Praia, mane, feto no mista sei lori medalla ba Timor-Leste. Ba semi-finál ne’e ami esforsu hadi’a di’ak liután ami-nia tesi, servis, pasiv, testil, no taike,” nia katak.
Atleta ne’e rekoñese iha jogu ne’e enfrenta dezafiu hanesan komunikasaun maibé nafatin ho espíritu voleibolizmu hodi hakat ba semi-finál.
Treinadór no Koordenadór Voleiból Praia Timor-Leste, Mario Bento Soares, agredese tebes tanba jogadór sira kontinua manán.
“Ita rekoñese loron dahuluk ita lakon, maibé ida-ne’e hanesan esperiénsia ba ita, liuliu ami treinadór oinsá hanorin tátika oioin ba jogadór sira hodi manán iha jogu. Ohin ita manán ona ekipa feto no mane sei hakat hotu ba semi-finál aban,” nia tenik.
Iha Jogu ne’e asiste direita husi Prezidente Repúblika, José Ramos Horta.
Jornalista : Osória Marques
Editora : Julia Chatarina
