DILI, 23 Jullu 2025 (TATOLI)—Iha kompetisaun Voleiból Praia iha Jogu Desportivu Komunidade País Lian Portugés (CPLP, sigla portugés), ekipa mane husi Kabuverde halakon Timor-Leste ho set rua, nune’e Portugál sei hasoru malu Kabuverde iha finál.
Iha kompetisaun ne’e ekipa Kabuverde reprezenta Michael no Denzel Ramos enkuantu Timor-Leste reprezenta husi Noe Siqueira no Felizberto Faria. Árbitu husi Timor-Leste, José Pereira no husi Portugál, Gomes.
Iha kampu parte rua halo esforsu ho ida-idak nia tátika no maneira oinsá atu gaña iha semifinál ne’e. Maibé rezultadu ne’ebé hatudu iha set dahuluk Kabuverde gaña ho 24 no Timor-Leste 22, iha set daruak ekipa rua nafatin esforsu maibé Timor-Leste konsege hadau pontu 21, Kabuverde 19 no termina hodi kontinua hakat ba set datoluk, Kabuverde 15 no Timor-Leste 5.
Jogadór Cabo Verde, Denzel Ramos, hateten, bainhira hala’o jogu sira, iha esperansa atu manán iha jogu referidu no horisehik mós treinu ho di’ak liu.
“Ami iha preparasaun ne’ebé di’ak, tanba ne’e ami iha duni esperansa atu hetan rezultadu ida-ne’e,” nia hato’o ba Ajénsia TATOLI, iha kampu Voleiból Praia, Bidau-Lesidere, Kuarta ne’e.
Notísia relevante : Ekipa feto Portugal husi modalidade Voleiból Praia tama semi-finál
Nia dehan, ho rezutadu ida-ne’e, sira iha esperansa boot atubele sai manán-na’in iha jogu referidu, tanba ne’e sei halo preparasaun ho masimu ba jogu tuir mai.
“Ami hein atu manán iha finál, maibé ami la hatene sé maka sei sai adversáriu, ekipa rua ne’e maka’as, maibé ami-nia esperansa mak atu manán jogu. Tátika iha jogu tuir mai la hatene, maibé bele mos lori jogu sira ne’e sai hanesan referénsia iha jogu tuir mai,” nia akresenta.
Nune’e mós, Treinadór Voleiból Praia, Mario Bento Sousa, hateten, atleta sira lakon tanba falla iha tátika.
“Tanba bola ne’ebé sira atu hamate, sira halo bola out mak barak, entaun ita presiza hadi’a, tanba ita foin mak prepara, ita kompara ho adversáriu, sira a’as liu ita,” nia tenik.
Tuir Treinadór, jogu ida ne la’ós atu kompete maibé tenke la’o ho tátiku.
“Ita sei hadi’a hodi kompete ba terseiru lugar, se portugál manán ita sei hasoru Mosambike, maibé orsida ita sei haree tanba Mosambike ita manán tiha sira dala-ida ona,” nia katak.
Jogu Voleiból Praia oras 10:00, ekipa mane Mosambike reprezenta husi Mauricio José no Arnaldo Nhantumbo, enkuantu ekipa Portugál Tito Oliveira no Filipe Neto.
Iha kompetisaun ne’e ekipa Portugál hetan vitória ho set rua, enkuantu Mosambike zero. Set dahuluk Portugál 21 no Mosambike 11 no set daruak Portugál 21 Mosambike 14.
Jogadór Portugál, Filipe Neto, sente kontente ho vitória ida-ne’e.
“Mosambike aprezenta ekipa ida ne’ebé di’ak, maibé ami konsege di’ak liu sira, no iha momentu balun ami hasoru difikuldade, maibé ami konsege luta to’o hotu,” nia hato’o.
Filipe Neto sente orgullu bele reprezenta Portugál iha jogu ne’e no agradese tebes ba família no belun sira ne’ebé suporta tantu iha portugál no fatin seluk.
“Ha’u hakarak agradese ba ha’u-nia familia, kolega no ema hotu iha Timor, purezemplu, ne’ebé ajuda organiza torneiu ida-ne’e, halo ha’u orgullu tebes,” jogadór ne’e hatutan.
Jogadór portugués ne’e adianta, bainhira sira to’o iha kampu, sempre halo treinu ho di’ak tantu ekipa feto no mane.
“Tanba ne’e, ami sempre luta atu manán no lori medalla ba Portugál, nune’e ami prepara hela ba jogu tuir mai, ho luta no esforsu, atu Portugál bele manán. Ho ida-ne’e ami-nia esperansa mak sempre luta ba títulu, hodi manán medalla”, nia hakotu.
Jornalista : Osória Marques
Editora : Julia Chatarina
