BOBONARU, 24 Jullu 2025 (TATOLI)—Jestór Rádiu Komunidade (RAKOM) Maliana, Filomeno Gonçalves Magalhães hakotu ona pregrinasaun iha mundu. Matebian hakotu-iis iha Hospital Nacionál Guido Valadares (HNGV) iha Kuarta (23/07) tuku 20:30 Otl hafoin baixa durante semana ida tanba hetan atakasaun iha servisu fatin.
“Iha Kinta semana kotuk, iha oras servisu nian maizumenus tuku 11:00 Otl, nia halo hela tranzmisaun direta ho fonte sira. Hafoin ne’e, nia hetan atakasaun. Ohin, ita rona katak hodikalan nia hakotu ona iis. Ninia mate-isin oras ne’e sei iha Dili. Iha prosesu atu lori mai Maliana,” Prezidente Konsellu Rádiu Komunidade Maliana, Paulino Viegas Tilman ba jornalista sira iha edifísiu Rádiu Komunidade Maliana, Kinta ne’e.
Paulino Viegas sente triste tanba lakon belun-boot ida-ne’ebé sai hanesan pioneriu ba Rádiu Komunidade Maliana.
Nia haktuir katak matebian Filomeno dedika-aan ba servisu hahú iha 2004 dezde instituisaun Rádiu Komunidade Maliana moris iha situasaun difisíl nia-laran no iha 2014 asumi kargu nu’udár jestór to’o hakotu-iis.
“Matebian ema ida-ne’ebé servisu nonook no servisu sempre susesu. Nia halo kna’ar ne’e Rádiu Komunidade Maliana dezenvolvidu uitoan kompara ho rádiu sira seluk. Nia halo buat barak. Uluk kuandu ami hahú komputadór ida de’it, agora ita bele haree ona iha komputadór barak hodi halo prosesu administrasaun rádiu nian no mós halo notísia depoiz tranzmiste ba ema hotu asesu informasaun tomak ne’ebé mak sira foti,” Filomeno haktuir.
Aleinde ne’e, jornalista Rádiu Komunidade Maliana, Eva Sidónia sente triste tanba lakon jestór ka líder di’ak ida-ne’ebé dedika nia-aan no fó tempu tomak halo servisu ba dezenvolvimentu rádiu liuliu tranzmite informasaun ba komunidade Maliana.
“Nia ema ne’ebé servisu badinas. Dadeer tuku 06:00 Otl de’it nia mai loke ona rádiu, depoiz servisu to’o tuku 22:00 no tuku 23:00 mak fila,” Eva lembra.
Enkuantu, matebian mate husik hela feen-kaben ho nia oan na’in-haat.
Jornalista: Sergio da Cruz
Editór: Xisto Freitas da Piedade
