MOP sei loke konkursu ba projetu drainajen iha Kaikoli
DILI, 25 Jullu 2025 (TATOLI)-Ministru Obra Públika, Samuel Marçal, hateten tempu badak sei loke konkursu ba projetu drainajen iha Kaikoli, tanba Ajénsia Dezenvolvimentu Nasionál (ADN) submete ona dadus verifikasaun.
“Espera tinan ida-ne’e bele asina kontratu, nune’e obra bele implementa ona”, Ministru informa ba jornalista sira iha nia knaar fatin, Kaikoli, ohin.
Drainajen ne’e, ministru esplika bee sira-ne’e atu dada ba tasi. Obra ne’e bainhira la’o ona, bele minimiza inundasaun husi parte Balide, Kaikoli. Maske la 100% mos bele ajuda ita-nia drainajen ida agora tun husi Audian no Villa-Verde ho kapasidade boot maibé atu sai fali ba tasi mak kapasidade ki’ik-oan ho medida neen-nulu de’it.
“Entaun bee foer sira atu sai tarde husi drainajen ne’e mak hamosu inundasaun bainhira iha tempu udan”, nia esplika.
Projetu ne’e, nia hatutan sei halo ho kapasidade boot no sei loke medida drainajen halo luan, nune’e fasilita bee-foer sai ho lalais hodi hamenus inundasaun iha fatin risku sira, enkuantu restu sei haree ba estudu didi’ak lai mak sei implementa.
Investimentu kuaze millaun $20
Membru governu ne’e mos akresenta investimentu ne’ebé governu halo hodi garante povu nia moris di’ak, liuliu iha área remota ne’ebé susar asesu ba infraestrutura bázika.
“Hadi’a uluk infranstrutura bázika ba aldeia sira-ne’ebé balun sofre tinan naruk ona”, ministru afirma.
Tinan ne’e, ministru hatete governu reabilita estrada hamutuk 100 liu iha territóriu nasionál, komparasaun tinan kotuk no tinan ne’e ladún rona ona kazu kona-ba mota sobu komunidade nia uma, tanba normaliza ona mota sira no konstrui morru protesaun.
“Tinan ida-ne’e ita tau orsamentu hodi hadi’a inframstrutura bázika sira kuaze rihun-ruanulu liu ba territóriu Timor, maibé kona-ba ezekusaun ne’e mak ha’u ladún hatene katak sira ezekuta ona hira”, tenik nia.
Notísia relevante: Konstrusaun drainajen iha suku Irabin de Baixo paradu
Jornalista : Alexandra da Costa
Editora : Rita Almeida
