BOBONARU, 30 Jullu 2025 (TATOLI)—Prezidensía Repúblika (PR), Kuarta ne’e, entrega apoia umanitária ho tipu ai-han no la’ós ai-han ba vítima inséndiu uma-kain ida iha Suku Male-Ubu, Postu Administrativu Bobobaru, Munisípiu Bobonaru.
Inséndiu ne’e akontese iha loron 23 fulan-Jullu 2025 rezulta uma no sasán uma-laran la salva.
Komandante Operasaun Autoridade Protesaun Sivíl (APC-sigla portugeza) Delegasaun Territoriál Munisípiu Bobonaru, Zeca Michael Lopez informa apoia umanitária ne’e nu’udár domin husi Prezidente Repúblika, José Ramos Horta atu hakmaan sofrimentu vítima ho nia família sira.
“Ami hetan kontatu husi Gabiente Prezidente Repúblika atu apoia buat balun. Ohin ita lori mai ne’e spring bed rua, roupa ba labarik sanulu, sapatu sanulu no ikan-lata kaixa ida para tulun família vítima ida-ne’e,” nia hateten ba jornalista sira iha fatin entrega sasán.
Komandante Operasionál APC Munisípiu Bobonaru ne’e subliña Governu sei fó mós apoia rekuperasaun tanba uma ne’e estragadu totál.
“Dadus sira-ne’e ita entrega ona bá nasionál. Ita hein desizaun husi nasionál,” Zeca haktuir.
Iha biban ne’e, Xefe Suku Male-Ubu, Quintiliano Barros Fernandes agradese ba Prezidénsia Repúblika no rekomenda ba Autoridade Protesaun Sivíl atu aselera apoia rekuperasaun tanba daudaun ne’e família vítima hela provizoriamente iha koziña.
“Sasán estragadu totál. Ne’e mak ami husu atu aselera, tanba fulan ida-rua mai tan tempu udan fali ona. Família iha-ne’e mós lubuk ida, sena-malu iha fatin ki’ik-oan, dapur mak sira loke tan hodi hela provizoriamente,” nia dehan.
Enkuantu, hafoin akontesimentu, Autoridade Protesaun Sivíl Munisípiu Bobonaru ho Diresaun Servisu Munisipál Risku Dezastre Naturál, Autoridade Munisipál Bobonaru mós fó ona apoia emerjénsía hodi hakmaan família nia sofrimentu durante loron balun.
Jornalista: Sergio da Cruz
Editór: Xisto Freitas da Piedade
