BOBONARU, 01 Agostu 2025 (TATOLI)–Autoridade munisípiu Bobonaru, Sesta ne’e, realiza mini Komité Revizaun Orsamentál (KRO) ba tetu Orsamentu Jerál Estádu (OJE) 2026 ne’ebé simu husi Ministériu Finansa (MF) iha Jullu 2025 ne’e.
Autoridade munisípiu Bobonaru simu tetu ho montante $8.450.379 ne’ebé fahe ba kategoria tolu hanesan saláriu no vensimentu $2.442.757, bens no servisu $1.330.375, no transferénsia públika $5,383,247.
“Ha’u husu ba Diretór Ida-idak atu halo justifikasaun atu nune’e ha’u bele intende hodi ba defende iha KRO,” Koordenadór Autoridade munisípiu Bobonaru, Celestino Marques, hateten iha intervensaun ba atividade ne’ebé realiza iha salaun Maria-Tapo.
Biban ne’e, Diretora Sekretariadu Finansa Autoridade munisípiu Bobonaru, Donata Marques, konfirma tetu OJE 2026 ne’ebé Autoridade munisípiu Bobonaru simu hetan redusaun maka’as iha kategoria saláriu no vensimentu ho totál $318.000-resin no bens no servisu $344.000.
Notísia relevante : Governu aprova revizaun polítiku ba OJE 2026-sei aprezenta ba PN
Donata fundamenta, bainhira iha redusaun husi kategoria saláriu no vensimentu ne’e afeta maka’as ba funsionáriu ajente administrasaun no Kazuál 163 nia saláriu inklui saláriu 13. Aleinde ne’e, ba kategoria bens no servisu afeta ba manutensaun Karru Funeráriu tolu, establesimentu fatin estasionamentu, arolamentu plaka gtoponómia no responde ba ponte no estrada ne’ebé kotu tanba afeta husi dezastre naturál.
“Ita hakarak orsamentu ne’ebé hetan redusaun ne’e sira tenke fó fila mai, entaun Gabinete haat husi Autoridade munisípiu, Autoridade postu administrativu no Diresaun Servisu munisipál ida-idak tenke halo justifikasaun forte nune’e Koordenadór autoridade munisípiu Bobonaru bele argumenta no defende iha KRO nasionál,” nia katak.
Antes ne’e, Autoridade munisípiu Bobonaru propoin orsamentu $11.308.414 ba tinan 2026 hodi finansia programa 16, sub-programa 35 no atividade 80.
Jornalista: Sergio da Cruz
Editór: Xisto Freitas da Piedade
