DILI, 01 Agostu 2025 (TATOLI)—Vizitante ema 100-resin vizita Palásiu Prezidensiál Nicolau Lobato iha Bairru Pite iha fulan-Juñu to’o Jullu 2025 ne’e, hodi reforsa papel Prezidensia Repúblika nian hanesan “Palásiu Nakloke” ba komunidade rai-laran no internasionál no diplomásia kulturál.
Tuir nota ne’ebé Agência Tatoli asesu haktuir, Vizita sira-ne’e parte husi programa edukativu no interkámbiu, ne’ebé atu promove koñesementu kona-ba istória no funsionamentu instituisaun Estadu sira iha Timor-Leste.
Entre vizitante sira, destaka mós delegasaun barak husi eskola sira hanesan husi Austrália inklui estudante husi Radford College (20 estudante, vizita dala 2), Sunshine Coast Grammar High School (29 estudante) no Tennyson College (25 estudante).
Unidade EEW husi Austrália vizita Palásiu iha oportunidade tolu la hanesan, ho grupu rua mai ema na’in-tolu (3) no grupu seluk mai ema na’in-lima (5) hanesan sinál interese ne’ebé kontínua husi organizasaun Australianu sira atu fortifika relasaun ho Timor-Leste. Marka mós prezensa iha Palásiu, Dircia Mouzinho ho grupu ema na’in haat (4), Ana Gomes no Ornella ho nia família mós partisipa vizita ne’e.
Palásiu Prezidensiál mós simu grupu lokál no internasional sira, inklui estudante husi UNTL na’in-neen (6), profesór husi Austrália (“Austrália knar”) ema na’in-haat (4), reprezentante husi grupu Homem Empower, ema na’in-neen (6) no grupu RYLA ho partisipante hamutuk na’in-35.
Iha nivel institusionál, vizita konjunta husi Vise-Prezidente INATEL no Vise-Prezidente Institutu Portugés Desportu no Juventude (IPDJ, sigla portugés) haforsa relasaun kooperasaun entre Timor-Leste no Portugál iha área juventude no desportu.
Iha fulan-jullu, Palásiu Prezidensiál Nicolau Lobato mós simu Grupu Labarik Májiku, ne’ebé koordena husi reprezentante ida ho labarik 50, atu fó espasu ba atividade edukativu no didátiku.
Vizita husi turista internasionál sira kontinua akontese, inklui Grupu Blue Mountain ho ema na’in-neen (6), grupu turista internasionál hamutuk na’in-12 no turista portugeza ida Cristina Teixeira ho nia oan na’in-rua (2).
Vizita sira ne’e reforsa kompromisu Prezidente Repúblika, José Ramos-Horta nian ba politika “Palásiu Abertu”, atu aproxima povu ho instituisaun Estadu no fó impulsu ba troka kulturál ho parseiru internasionál sira.
TATOLI
