Ministru Samuel klarifika ai-oan akadiru iha jardín Akadiruhun
DILI, 04 Agostu 2025 (TATOLI)-Ministru Obra Públika, Samuel Marçal, klarifika ai-oan akadiru ne’ebé kompañia kuda iha jardín Akadiruhun tanba identiku ho rai nia naran.
“Sei la fó impaktu ba ema bainhira halo movimentu ba mai, ita mós halo kontrola ba ai-horis hirak ne’ebé kuda iha estrada klaran atu labele fó impaktu ba ema nia vida”, ministru ba jornalista sira hafoin enkontru Konsellu Ministru estraordináriu iha Palásiu Governu, segunda-ne’e.
Nia hatete ai-oan akadiru ne’ebé kompañia kuda, bazea ba orientasaun husi governu. Ai-horis sira ne’ebé planta, la sai problema tanba define ona problema no solusaun.
Supervizór kompañia Montana Di’ak, José Pereira, hateten atu kuda akadiru hun-haat maibé foin ida, entaun tolu sei kuda iha faze tuir mai, bainhira kompañia nahe ona alkatraun ba faze daruak nian.
“Plantasaun akadiru ne’e ami foti husi Hera, entaun aleinde ami kuda akadiru. ami mós kuda ai-hali mutin, ai-funan, ai-kafé no seluk tan”, nia informa.
Nia dehan planta ai-oan akadiru ne’e bazea ba orientasaun governu no hanoin husi autoridade lokál iha Akadiruhun. “Akadiru ne’e sei la fó impaktu ba ema halo movimentu, depois sei destaka ema sira-ne’ebé bele halo monitorizasaun hodi tesi”.
Ekipa téknika kompañia Montana Di’ak kontinua kuda plantasaun oioin kuaze 80 iha Bidau Akadiruhun.
Notísia relevante: Progresu konstrusaun ba projetu iha Bidau atinje ona 65%
Jornalista : Alexandra da Costa
Editora : Rita Almeida
