Ahi-han uma ualu iha antigu merkadu Bekora
DILI, 25 Agostu 2025 (TATOLI)—Ahi-han uma ualu iha antigu Merkadu Becora Temporária Ponte Maufelu, iha Domingu (14/08), maizumenus tuku 14:00, ne’ebé komunidade lokál seidauk hatene loloos kauza husi akontesimentu ne’e.
“Akontesimentu ne’e iha tuku 14:00 otl, ne’e ami toba dukur hotu, derrepente ahi lakan sa’e kuiñada ida mak haree hakilar hodi ami halai sai hotu hodi ajuda rega hotu molok bombeiru to’o mai ajuda rega, maibé alin estudante sira-nia dokumentu sira balun salva hanesan pasta, kadernu KRS, roupa, kulisaun, jelera, televizaun maibé balun la konsege salva. Bombeiru rega bokon hotu kedas hetan estragu,” Portavós vítima inséndiu, Josefa José Ximenes, hato’o iha nia rezidénsia, iha antigu Merkadu Bekora, Segundu ne’e.
Nia haktuir, horiseik bainhira akontese inséndiu ne’e, komunidade kontaktu kedan parte Bombeiru hodi mai apoiu hamate ahi no sira foti ona dadus iha uma-kain ualu mak afetadu.
“Bainhira akontese ami rega no kontaktu hudi apoiu ba parte Bombeiru hodi mai ajuda rega no horisehik mós parte Bombeiru foti ona dadus uma-kain mak sai vitima sira, maibé seidauk hetan apoiu ruma husi parte Governu no parte privadu, maibé horsehik Bombeiru hateten ohin sei mai apoiu, to’o agora seidauk mai hela de’it,” nia akresenta.
Notísia relevante : SEAK husu família vítima ahi-han uma-lisan iha Gariuai prepara relatóriu hodi hetan apoiu
Josefa José, hateten, labarik estudante sira ohin la tama eskola tanba atributu eskola ahi han hotu ne’ebé ohin sira husu lisensa iha eskola sira tanba labele la tuir aula.
“Labarik sira nia farda, kadernu, farda eskola ahi-han hotu ohin ami husu lisensa sira la tuir matéria,” vítima inséndiu dehan.
Nia konta tuir, horisehik remata akontesimentu ne’e, komúnidade hadi’a no hamos tiha fatin balun hodi toba no balun toba iha família nia uma.
“Ami desde horsehik akontesimentu ne’e hamoos tiha bee ne’ebé rega nahe karpet hodi toba iha fatin ne’e. Ami la tein no la han desde horsheik to’o kalan boot mak hasai osan hodi sosa hahán han hodi aguenta, tanba ami seidauk hetan apoiu ruma husi Governu,” nia katak.
Nia afirma, sira hela iha fatin ne’e desde krizi 2006 to’o daudaun ne’e.
Komunidade afetadu ba insendiu ne’e mai husi munisípiu Baucau, Vikeke no Lautém. Nune’e, komunidade husu ba parte Governu bele tau-matan ba sira.
“Ami hakarak Estadu tau-matan hodi hare ami-nia sasán sira ne’ebé ahi han ne’e, dokumentu no sasan eskola nian sira ne’e ahi han hotu kedan, Governu mai ajuda netik ami apoiu nesesidade bázika hodi bele hadi’a fali ami-nia fatin ne’e hodi hela bá,” nia tenik.
Iha fatin hanesan, Reprezente estudante, Rumaldo do Carmo Ximenes husi munisípiu Baucau, informa, daudaun nia parte kontinua hala’o estudu iha Universidade Nasionál Timor-Lorosa’e (UNTL), Fakuldade Agrikultura no Departamentu pekuária semester IV, iha inséndiu ne’e nia dokumentu importante sira hanesan kRS, kadernu sira hetan estragu hotu no iha dokumentu balu mak konsege salva.
“Akontesimentu horisehik ha’u bá tiha serbisu, hetan kontaktu husi kolega sira katak ahi-han uma, ha’u konsege mai duni to’o iha fatin akontesimentu ne’e fatin ne’ebé ami hela bá ahi-han hotu, dokumentu eskola nian balu hanesan KRS balu ahi han no balu bokon kadernu ami la konsege salva no balu ami salva tanbá ahi-han. Espera Governu bele ajuda apoiu materiál no hahán,” nia hato’o.
Jornalista : Osória Marques
Editora : Julia Chatarina
