DILI, 08 Setembru 2025 (TATOLI) – Dolores Verdiana da Silva Costa ho naran estimada “Dolores” ne’e futebolista feminina timoroan ida, alende iha rai-laran, reprezenta ona Timor-Leste iha kompetisaun iha nasaun lubuk ida iha rai-li’ur, iha eventu internasionál sira.
Hanesan futebolista, nia sente motivadu no idola mak Marta Vieira da Silva ne’ebé koñesidu ho naran Marta – futebolista profisionál Brazileira.
Kronolojia, paixaun ba futeból hahú mosu, bainhira Dolores sei idade 10-resin, iha ne’ebé televizaun sai hanesan janela mundu ba nia hodi haree mundu nia furak no buka hatene matéria inspirasaun sira iha ne’ebe nia hetan kona inpirasaun di’ak ida husi mídia BBC World.
Iha momentu ne’ebá, nia hetan figura ida – feto bonita ida ho naran Marta Vieira da Silva, nia joga bola hanesan mane – téknika, tátika no abilidade oioin nia hatudu. Mídia BBC World fó sai nia abilidade, kapasidade no estratéjia jogu ne’ebé idéntiku ho futebolista mundiál Cristiano Ronaldo ka baibain koñesidu ho “CR7”.
“Husi mundu nia naroman fó motiva ona iha momentu ne’ebá. Ha’u hanoin, feto mós bele joga bola hanesan mane,” Dolores hato’o ba jornalista TATOLI iha Dili, foin lalais ne’e.
Iha nia komentáriu, Dolores haktuir, iha altura ne’ebá nia iha paixaun atu sai jogadór futebolista ne’e difísil tebes ba nia tanba ema hotu sei la konkorda feto sai jogadór ka futebolista ida ho nune’e nia nafatin esforsu to’o ohin loron nia konsege joga to’o ona iha internasionál.
“Maske iha tempu ne’ebé sosiedade no família balun seidauk aseita feto iha desportu, Dolores kontinua ho determinasaun. Sustentu husi paisaun no inspirasaun husi Marta no maun nian, halo Dolores hela ba frente (oin)”, nia orgullu.
Futebolista feminina ho idade-34 ne’e rekorda katak nia parte hamutuk ho ekipa la’ós jogu de’it iha eventu desportivu iha nível doméstiku maibé mós iha jogu ‘prestíjiu’ sira iha kompetisaun internasionál hanesan Tailándia, Filipina, Laos no iha Vietnam.
Jogu kualifikasaun AFC Women’s Asian cup Australia 2026, iha estádiu Chiang Mai Tailándia, iha loron 05 Jullu 2025 nia ho kolega sira marka golu 3-1 kontra Mongolia, nia sente kontente ho vitória ne’e tanba atinji duni nia mehi.
“Momentu ne’ebá ha’u marka golu ikus entre husi kolega na’in-rua. Ha’u sente kontente tebes tanba ha’u mós bele marka ona golu ida iha internasionál”, nia akresenta.
Ora ne’e daudaun, Dolores ne’ebé joga iha klube S’AMUSER ne’e konta, nia ema ida ne’ebé hakarak tebes atu aprende husi nia maluk sira atu motiva nia oinsá sai jogadór di’ak ida iha rai ida-ne’e.
Ba nia, Futebol fó benefísiu pesoál. “Ha’u sente liberdade, konfiansa no orgullu kada momentu ha’u joga,” nia hateten ho otimista.
Alende ne’e, joga futebol, tuir Dolores, iha vantajen no desvantajen rasik.
Vantajen sira
- Hadi’a saúde fíziku no mentál;
- Ensina reziliénsia, lideransa na responsabilidade;
- Hakarak amizade no hela iha komunidade;
- Fó oportunidade atu aprende komunikasaun no traballu ekipa;
Desvantajen sira
- Kanek komún sira inklui metan, torsaun, problema iha ain-tuur no ligamentu sira –liuliu se kontinua lahó deskansa.
- Espetativa aas ba rezultadu, krítika husi kolega sira ka família bele hamosu stress emosionál;
- Iha labarik sira, desportu kompetitivu bele aumenta stress família nian – se la jere ho di’ak;
- Treinamentu no jogu regulár bele interfere ho tempu pesoál, estudu/serbisu, deskansa, no moris família nian;
- Joga demais, lahó deskansa, bele hamosu fadiga krónika, diminuisaun iha dezempeñu, ka esgotamentu;
- Iha fatin sira ne’ebé laiha infraestrutura, materiál, ka apoiu, bele susar atu prátika beibeik;
Futebolista feminina timoroan ne’e mós husu ba feto maluk sira, alin foin-sa’e sira, “Mai ita hamutuk kontribui ba dezenvolvimentu futeból feto. Futeból la’ós kona-ba jogu de’it; futeból mós la’ós ba mane de’it. Maibe, futeból mós hanesan oportunidade ida ba feto sira atu hatudu sira-nia kapasidade, lideransa, no kontribuisaun ba Timor-Leste”.
Koñese futebolista Dolores
Naran kumpletu : Dolores Verdiana da Silva Costa
Idade : 34
Inan-aman : Catarina G. da silva (Doméstika) no aman Antonio M. da Costa (doméstiku)
Desendente : Dili
Estudu : ramata ona iha Universidade ISTA AKPRING JOGJAKARTA
Entretantu, Dolores alende hanesan futebolista, nia mós serbisu iha operadora telekomunikasaun Telkomcel.
Jornalista: Ivonia da Silva
Editór: Rafael Ximenes de A. Belo
