DILI, 09 Setembru 2025 (TATOLI)—Ministra Edukasaun (ME), Dulce de Jesus Soares hateten taxa labarik mane abandona eskola barak liu kompara ho labarik feto sira.
Tuir peskiza Banku Mundiál tinan 2023, demonstra katak feto 24.2% mak servisu ona kompara mane iha de’it 36.9%.
“Ita lalika la’o dook. Iha Ministériu Edukasaun de’it mós ita haree katak antes ne’e profesór mak barak liu duké profesora. Entaun, daudaun ne’e ita tau prioridade atu sai manorin ne’e ba feto, nune’e ita bele hasa’e taxa partisipasaun feto iha servisu Ministériu Edukasaun nian liuhusi bolsa kandidatu,” Ministra Dulce de Jesus Soares dehan iha serimónia enserramentu formasaun kona-ba emprendedorizmu iha INFORDEPE, Balide, Tersa ne’e.
Notísia relevante: INFORDEPE fasilita ona formasaun ba manorin 400 bolsa kandidatu
Tuir nia katak bainhira labarik feto sira sai profesora bele sai mós ezemplu ida atubele enkoraja feto sira seluk hodi kontinua sira-nia estudu. Tanba ne’e, programa referidu iha parte rua. Ida fó formasaun intensivu ba joven sira iha Munisípiu Lautein no mós Oekusi.
Ministra Dulce tenik liuhusi formasaun referida labele sai hanesan formasaun de’it, maibé bainhira filafali ba munisípiu karik bele implementa duni.
“Tanba ne’e, ha’u espera katak ho buat ne’ebé mak ita-boot sira hetan durante loron hirak iha-ne’e, bele implemeta iha eskola sira,” nia hateten.
Governante ne’e hatutan formasaun ne’e hanesan programa ida husi IX Governu Konstituisinál nian, ne’ebé atu hadi’a kualidade edukasaun no dezempregu to’o tinan 2028. Nune’e, Timor-Leste sei atinje kualidade edukasaun ne’ebé di’akliu, hodi hatán ba nesesidade sira husi merkadu traballu hodi kontribui hamenus dezempregu no hakotu siklu pobreza.
“Formasaun ne’e sai pasu dahuluk ne’ebé atinje meta sira, liuhusi ajuda foinsa’e sira husi komunidade rurál atu dezenvolve sira-nia abilidade emprendedorizmu, literásia dijitál, finanseiru no abilidade sira seluk iha sékulu XXI, hodibele aproveita oportunidade ekonómika lokál sira,” Ministra Dulce dehan.
Jornalista: Osória Marques
Editór: Xisto Freitas da Piedade
