DILI, 18 Setembru 2025 (TATOLI)—Diretór Eskola Ensinu Báziku Sentrál (EBC) 30 Agostu, Baltazar Borromeu hateten Eskola EBC 30 Agostu simu ona matrix husi Ministériu Edukasaun (ME), hodi halo preparasaun ba ezame nasionál ne’ebé akontese iha 20 Outubru tinan ne’e.
“Ita-nia preparasaun másima ona ba ezame nasionál ne’ebé sei monu iha loron-20 Outobru. Tanba ami simu ona matrix, entaun ami husu profesór dixiplina sira atubele halo rezumu badak hodi fó fali ba estudante sira atu prepara. Basá liuhosi rezumu ne’e sira mós bele esforsu liután nune’e susesu iha ezame nasinál,” nia informa ba jornalista sira iha nia kna’ar fatin Komoro, Dili, Kinta ne’e.
Nune’e, nia husu ba inan-aman atu kontrola oan sira prepara no estuda didi’ak.
“Tanba ne’e, preparasaun ita husu de’it ona ba estudante sira, nune’e ita obriga sira atu haka’as-aan aprende iha eskola no mós iha uma. Nune’e, ami sujere ba inan-aman katak iha eskola profesór sira kontrola, maibé iha uma inan-aman sira mós tenke kontrola atu haruka oan sira estuda,” nia dehan.
Notísia relevante: ME imprime pontu ezame nasionál iha Setembru no ezame realiza 20 Outubru
Kona-ba fasilidade sira-ne’ebé sei utiliza ba ezame nasionál, Baltazar hateten preparadu ona ba ezame nasionál tanba saladeaula sufisiente.
“Ami iha eskola 30 Agostu saladeaula no profesór mós sufisiente, tanba eskola iha saladeaula hamutuk 36,” nia afirma.
Entretantu, eskola rejistu ona estudante ne’ebé atu tuir ezame nasionál hamutuk 534, kompostu husi mane hamutuk 237 no feto hamutuk 259. Dadus ne’e submete ona ba Ministériu Edukasaun hodi prepara ba prosesu dokumentu sira.
Iha parte seluk, Koordenadór Gabinete Kurríkulu Unidade Nasionál, João Maupelu hatutan elaborasaun matéria ezame ninian finalizadu ona no agora tama iha faze revizaun kualidade kontrolu ba pontu.
“Prosesu elaborasaun ba pontu ezame nasionál ne’e hotu ona. Agora iha faze revizaun matéria, maibé besik atu finaliza ona,” nia tenik.
Tuir dadus provizóriu, lista finalista ne’ebé Ministériu Edukasaun rejista tantu ensinu báziku no ensinu sekundáriu hamutuk 54.000.
Ba ensinu báziku, ezame nasionál loron tolu no sei kontinua ezame lokál, depoiz ba ensinu sekundáriu ezame nasionál loron haat no kontinua kedas ba ezame lokál.
“Tinan ne’e ita imprime pontu ezame nasionál iha sentru impresaun Ministériu Edukasaun nian. Prosesu impresaun ne’e durante loron 40 nia laran. Nune’e, iha 17 Outubru ita sei atribui ba eskola no realiza ezame nasionál iha 20 Outubru,” nia akresenta.
Jornalista: Osória Marques
Editór: Xisto Freitas da Piedade
