UNTL suspende ona alegadu MFB
DILI, 13 Outubru 2025 (TATOLI)–Ministru Ensinu Superiór Siénsia no Kultura (MESSK), José Honório da Costa Pereira Jerónimo informa Universidade Nasionál Timor Lorosa’e (UNTL) suspende ona alegadu MFB ne’ebé suspeita ba kazu asédiu sexuál iha Fakuldade Siénsia Sosiál (FCS).
“Hosi UNTL suspende ona dosente MFB hodi labele hanorin bainhira nia iha hela kazu. Maibé, kuandu atu kontinua hanorin ka lae, ne’e depende ba nia kazu tanba nia ema funsionáriu públiku mak desizaun hotu-hotu iha Komisaun Funsaun Públika (KFP) nia liman,” Ministru José Honório hateten ba jornalista sira hafoin enkontru ho estrutura UNTL ligadu ho asédiu sexuál ne’ebé akontese iha FCS, iha salaun MESSK, Kolmera, Dili, Segunda ne’e.
Nune’e, Ministru ne’e apela ba estrutura UNTL atu aselera prosesu kazu referidu.
Notísia relevante: Suspeitadu ba asédiu sexuál, estudante husu reitór demite MFB
“Prosesu Konsellu Dixiplinár mós haruka ona karta ba Komisaun Funsaun Públika tanba nia funsionáriu públiku, depoiz KFP mak hasai desizaun ba atu ne’ebé dosente komete. Ha’u apela katak universidade tenke seguru ba estudante sira sé de’it mak eskola iha-ne’ebá tenke respeita estudante. Estudante tenke hato’o ba parte relevante karik dosente halo asédiu sexuál,” nia fundamenta.
Nia dehan étika, morál no respeita ne’e importante ba kada dosente no mós estudante. Parte tolu ne’e iha ligasaun ba malu. Tanba kuandu iha identidade mak iha dignidade mós.
“Ita-nia kultura ne’e la’ós anarkizmu, brutalizmu maibé ita-nia kultura ne’e diálogu. Entaun, husi ne’e ha’u apela ba estrutura UNTL atu halo enkontru regulár ida hodi hatane saida mak akontese. Tanba kazu ida hanesan ne’e ita tenke halo sensibiliza lalais no rezolve. Ita labele husik to’o grave. Tanba ne’e, ohin dadeer ha’u bolu estrutura UNTL aselera lalais kazu ligadu ho asédiu sexuál ne’ebé akontese iha Fakuldade Siénsia Sosiál. Ita-boot sira hatene katak iha semana hirak liubá, ne’ebé virál iha mídia sosiál no mós estudante sira halo konferénsia imprensa,” Ministru dehan.
Govenante ne’e hatutan hanesan Ministru Ensinu Superiór presiza haree asuntu ida-ne’e ho kle’an tanba MESSK asina ona konkordánsia ho UN Women ba kazu sira hanesan ne’e.
Jornalista: Osória Marques
Editór: Xisto Freitas da Piedade
