DILI, 17 Outubru 2025 (TATOLI)—Ministra Edukasaun (ME), Dulce de Jesus Soares informa konstrusaun ba eskola Ensinu Báziku Filiál Lospalos tama ona iha planu prioridade 2026.
“Eskola Ensinu Báziku Filiál ne’e hetan apoia konstrusaun hosi Japan International Corporation Agency (JICA), maibé akontese dezastre naturál hodi estraga filafali eskola ne’e. Entaun, Ministériu Edukasaun planu prioridade 2026,” Ministra Edukasaun, Dulce de Jesus hateten ba jornalista sira iha Sentru Nasionál Impresaun Komoro, Sesta ne’e.
Ministra Dulce haktuir, antes ne’e, Ministériu Edukasaun liuhusi Diresaun Nasionál Asaun Eskolár apoiu ona materiál emerjénsia hanesan zinku ho ai hodi konstrui nia kakuluk. Momentu ne’ebá, ME laiha orsamentu ba atu responde ba situasaun emerjénsia.
Governante ne’e dehan, agora populasaun iha Lospalos oferese ona rai, nune’e tinan oin bele halo konstrusaun.
“Rai propriedade Estadu iha-ne’ebá laiha tanba ne’e ME seidauk bele konstrui eskola referida, maibé iha 2025 populasaun sira iha fatin ne’ebá oferese ona rai atu hahu konstrusaun iha 2026,” nia informa.
Antes ne’e, Prezidente Komisaun G ne’ebé trata Asuntu Edukasaun, Juventude, Kultura no Sidadania, Deputadu Armando Lopes hato’o asuntu referidu liuhusi plenária PN, Segunda liubá.
“Eskola Filiál Ailafa ikus-ikus ne’e ema bolu dehan eskola filiál bibi luhan tanba hafoin erosaun akontese iha fatin ne’e, rai taka tiha eskola ne’ebé konstrui ho orsamentu rihun $90,” Armando haktuir.
Nia hatutan, eskola ne’e hetan estragu husi erosaun eskola iha tinan 2023, no iha tinan 2024, komisaun G husu ba Governu liuliu Ministeriu Edukasaun atu koordena ho Autoridade Munisípiu hodi reabilita lalais eskola.
“Dezde ne’e kedas estudante sira uza bibi luhan no armazein kompañia ida nian atu halo prosesu aprendizajen. To’o agora kompleta ona tinan tolu. Agora besik udan ona tanba ne’e ami husu haraik-aan ba Ministeriu Edukasaun atu urjentemente solusiona problema ne’e,” nia dehan.
Jornalista: Osória Marques
Editór: Xisto Freitas da Piedade
