MAPPF kontinua apela komunidade vasina animál hodi prevene moras Raiva
DILI, 25 Outubru 2025 (TATOLI)—Ministru Agrikultura, Pekuária, Peska no Floresta (MAPPF), Marcos da Cruz, apela nafatin ba komunidade atu lori sira-nia animál liuliu asu ba vasina iha parte veternária sira hodi prevene moras raiva.
“Asu ne’ebé ho moras Raiva mak tata ema, entaun ema ne’e sei mate. Ho nune’e, maneria ne’ebé parte Governu halo mak ita halo vasina ba animál sira hanesan asu, busa, lekirauk no animál sira seluk,” Ministru Marcos da Cruz hateten bainhira partisipa iha Kompetisaun planu negósiu inovativu 2025, iha Timor Plaza, ohin.
Nia dehan, ema hirak ne’ebé mak mate ona ba moras Raiva tuir informasaun husi pesoál saúde sira katak sira-nee mate tanba sira lakohi koopera ho Govenu liuhusi veterinária ne’ebé halo servisu vasina ba animál sira.
“Bainhira ita-nia pesoál ba sira lakohi lori sira-nia asu mai, sira lori tiha ba toos, ho nunee sira lakohi koopera, entaun asu ne’e ba tata ema ikus mai deteta katak asu nee iha moras Raiva, “ nia esplika.
Nia dehan, husi asaun sira-ne’e hotu mak Governu liuhusi Ministériu Agrikultura, Pekuária, Peskas no Floresta apela beibeik ba komunidade atu lori sira-nia animál mai iha veterinária atu hetan vasina.
“La presisa pessoal veterinária ba to’o idak idak nia uma mak atu fó vasina ba ita-boot sira-nia animál, maibé di’ak-liu mak sira seidauk to’o iha imi-nia uma bele lori ona imi-nia animál ba parte veterinária atu nunee bele fo vasina,” nia dehan.
Governante ne’e husu ba komunidade katak animál sira hanesan asu, busa, lekirauk no animál sira seluk hanesan fahi, bibi bele kontaktu liuhusi numeru telemóvel ne’ebe mak públika ona iha pájina MAPPF nian.
“Ita iha vasina ne’e mai husi Austrália 200 mil doze agora ita halo ona vasina ba animál liuliu asun ne’e mais 70 mil. Maibé sei hela 100 mil-resin iha atu bele fó vasina tanba animál sira ne’ebé mak seidauk vasina,” nia dehan.
Jornalista : Felicidade Ximenes
Editór : Cancio Ximenes
