DILI, 29 Outubru 2025 (TATOLI)—Ekipa Futeból Mane Asosiasaun Dili Leste sei hasoru Asosiasaun Futeból Manufahi hafoin halakon Ermera liuhosi jogu meiu finál iha Estádiu Munisipál Dili, 29 Outubru.
Kompetisaun futeból mane Kopa Juveníl sub-17 tinan 2025 hakat to’o ona iha faze finál hafoin rezultadu jogu meiu finál hatudu Asosiasaun Manufahi sei kontra uma-na’in Dili Leste ne’ebé tuir kalendáriu sei hala’o iha Estádiu Munisipál Dili, Sesta (31/10/2025).
Ekipa uma-na’in Dili Leste konsege hadau tikete ba finál hafoin halakon Asosiasaun Futeból Ermera iha-ne’ebé jogadór Frenky dos Santos loke oportunidade atu hasoru Manufahi iha finál liuhosi prodús golu iha parte dahuluk iha minutu sanulu (10).
Notísia relevante: Ekipa futeból mane husi Manufahi hakat bá finál Kopa Juveníl Sub-17
Iha parte daruak, mezmu Asosiasaun Ermera koko duni golu maibé defeza sentru husi Dili Leste ne’ebé joga ho disiplina la fó oportunidade atu kafé anan prodús golu no kontra-atake ne’ebé lansa husi Dili Leste rezulta golu ba daruak ne’ebé enxe husi jogadór Estevão Ximenes iha minutu 72.
Ho rezultadu jogu entre ekipa rua, Dili Leste konsege xave oportunidade ba Ermera kontinua bá finál no obrigadu tenke buka terseiru lugár kontra Vikeke ne’ebé derrota 2-3 bainhira kontra Manufahi.
Jornalista: Natalino Belo
Editór: Xisto Freitas da Piedade
