DILI, 30 Outubru 2025 (TATOLI)—Ekipa Futeból Asosiasaun Manufahi fiar aan sai kampiaun bainhira hasoru Asosiasaun Dili Leste iha finál Kopa Juveníl Sub-17.
“Bola kabuar, maibé ami sei hatudu jogu másimu iha finál no ami fiar aan bele sai kampiaun,” Treinadór Asosiasaun Futeból Manufahi, Rizal Nurdin informa ba TATOLI iha Estádiu Munisipál Dili, Kinta ne’e.
Nurdin relata bainhira hahú kompetisaun husi nivel munisípiu to’o sai vensedór iha rejiaun II Asosiasaun Futeból Manufahi iha ona mehi hakat bá finál mezmu hasoru dezafiu maibé garante bele sai kampiaun tanba halo preparasaun másima.
Notísia relevante: Ekipa futeból mane Dili Leste sei hasoru Manufahi iha finál Kopa Juveníl Sub-17
Treinadór Asosiasaun Futeból Manufahi, Rizal Nurdin esplika jogadór sira presiza hadi’a liután tátika no teknika bainhira kontra Dili Leste.
Entretantu, kompetisaun Kopa Juveníl Sub-17 mane sei hala’o finál Manufahi no Dili Leste inklui Vikeke sei kontra Ermera hodi hadau terseiru lugár iha Estádiu Munisipál Dili, loron Sesta (31/10/2025).
Jornalista: Natalino Belo
Editór: Xisto Freitas da Piedade
