DILI, 06 Novembru 2025 (TATOLI)—Primeiru-Ministru, Kay Rala Xanana Gusmão, hateten Governu foti desizaun atu halo redusaun ba prosesu importasaun sasán liuliu mesesidade bázika husi rai-li’ur, entaun Timor-Leste tenke investe ninia produtu rasik atu povu labele dependénsia ba sasán importasaun.
Xefe Governu hato’o kestaun ne’e hodi hatán ba deputadu Aniceto Guterres nia preokupasaun kona-ba ekonómia importasaun, entaun tanba ekonómia importasaun ne’e mak Governu buka halo daudaun buat balun ona maske labarak.
“Bainhira ita atu redus ekonómia importasaun ita iha problema boot mak saida de’it mak labarik sira sosa han no hemu ne’e ita haree katak ita-nia rai bele produs,” Primeiru-Ministru, Kay Rala Xanana Gusmão, hatán ba intervensaun husi ddeputadu sira iha diskusaun loron daruak ba Orsamentu Jerál Estadu (OJE) 2026 iha faze jeneralidade ne’ebé hala’o iha Parlamentu Nasionál, ohin.
Enkuantu xefe Governu dehan, bainhira Timor-Leste bele prodús produtu rasik tanbasá mak Timor-Leste tenke kontinua sosa sasán husi rai-li’ur.
“Tanba ita halo planu ida la’ós kumpre letra maibé ekonomia importasaun ne’e ami haree liu mak sasán sira-ne’ebé faan hela iha loja sira atu labarik ka família sira sosa,” nia dehan.
Tanba ne’e, nia dehan, Governu buka kria Banku Dezenvolvimentu halo espozisaun balun hodi fó oportunidade ba joven sira atu investe husi sira-nia produtu rasik.
Ho kestaun hirak ne’e mak Governu esforsu kria banku dezenvolvimentu atu fó kréditu ba setór privadu sira atu hasa’e reseita kreximentu ekonómia rai-laran no iha inisiativa atu investe Timor-Leste nia produtu rasik hodi redús sasán importasaun.
“Tamba ita atu hala’o buat sira-ne’e hotu la’ós hanesan milagre hodi redús importasaun husi saida de’it mak ita bele halo,” nia hateten.
Ministru Agrikultura, Pekuária, Peska no Floresta (MAPPF), Marcos da Cruz, hateten bainhira atu redús importasaun sasán husi rai-li’ur, ita tenke moderniza sistema setór agrikultura nian entaun ita presiza hasa’e bee hodi fornese ba natar sira hodi hetan produsaun ne’ebé di’ak.
“Problema boot mak laiha bee no laiha irigasaun tamba natar ne’ebé iha poténsia nakonu ho sedimentasaun,” nia dehan.
Jornalista : Alexandra da Costa
Editór : Cancio Ximenes
