Kualifikasaun AFC Asian Cup, Timor-Leste derrota tan ho Bharain 0-3
DILI, 26 Novembru 2025 (TATOLI)–Ekipa Selesaun Nasionál Futeból Timor-Leste derrota tan ho Bharain ho skor 0-3 iha jogu kontinuasaun faze Grupu A AFC Asian Cup U-17.
Jogu ne’ebé hala’o iha Estádiu Yangchuan, Xina, Kuarta ne’e, ekipa Lafaek derrota golu 0-2 iha parte dahuluk hafoin jogadór Mohammed Al Hassouni loke tabela skor 0-1 iha minutu 26 no Eyad Mustafa iha minutu 45.
Notísia relevante: Kualifikasaun AFC Asian Cup U-17, Xina hurlele Lafaek 14-0
Ekipa Timor-Leste ne’ebé derrota ona iha jogu rua antes kontra Bangladés no Xina konsege responde atake Bahrain liuhusi defensiva ho koletiva maibé Bharain aumenta tan golu ida iha minutu 90 liuhusi jogadór Mustafa.
Ho rezultadu jogu entre ekipa rua, Timor-Leste kontinua mantein iha pozisaun dalimak ho pontu 0, rezultadu derrota tolu (3) no produtividade golu -21, enkuantu Bharain okupa iha pozisaun datoluk ho pontu neen (6), rezultadu manán rua (2) no derrota ida (1).
Entretantu, tuir órariu, Timor-Leste sei hala’o tan jogu rua kontra Brunei Darussalam ne’ebé realiza iha Estádiu Tonglianglong, Sesta (28/11/2025) no ikus kontra Srilanka ne’ebé hala’o iha Estádiu Yangchuan, Domingu (30/11/2025).
Jornalista: Natalino Belo
Editór: Xisto Freitas da Piedade
