Timor-Leste liki Brunei Darussalam iha Loron Proklamasaun Independénsia
DILI, 28 Novembru 2025 (TATOLI)–Selesaun Nasionál Futeból Timor-Leste U-17 konsege liki (manán) Brunei Darussalam ho skor 0-2 iha jogu kontinuasaun faze kualifikasaun Grupu A AFC Asian Cup.
Ekipa Timor-Leste ne’ebé derrota ona datoluk hasoru ekipa zigante hanesan Xina, Bangladés no Bahrain ikusmai konsege marka pontu iha tabela klasifikasaun ho pontu tolu iha Estádiu Tonglianglong, Sesta ne’e.
Vitória ne’ebé jogadór U-17 gaña nu’udár prémiu ida ba komunidade hadomi futeból tanba iha loron ohin Timor-Leste festeja loron istóriku Proklamasaun Independénsia RDTL ba da-50.
Notísia relevante: FFTL rejeita hili família iha selesaun nasionál U-17
Elementu Manuel Alari da Costa Soares ne’e iha jogu parte dahuluk lidera 0-1 liuhusi jogadór Manuel da Silva iha minutu 20 no kontinua aumenta skor 0-2 iha parte daruak ne’ebé enxe husi jogadór Jacob Maia iha minutu 67.
Ba vitória ne’e, Diretór Serbisu Selesaun Nasionál Federasaun Futeból Timor-Leste (FFTL), João Manico Amaral hateten Timor-Leste manán Brunei tanba konsideradu iha kualidade ekipa ne’ebé iguál.
“Jogu ohin ne’e importante tanba loron hanesan ita selebra Loron Proklamasaun Independénsia nune’e vitória ida-ne’e nu’udár prémiu ba loron nasionál Timor-Leste,” João Manico informa ba TATOLI iha ninia kna’ar fatin, Bairros dos Grilos.
Ho rezultadu jogu entre ekipa rua, rezulta eleva Timor-Leste iha tabela klasifikasaun ba pozisaun dalimak ho pontu tolu (3), enkuantu Brunei Darussalam iha pozisaun daneen ho pontu 0.
Jornalista: Natalino Belo
Editór: Xisto Freitas da Piedade
