Infidelidade harahun família no labarik sira-nia futuru – Don Norberto
MALIANA, 28 Dezembru 2025 (TATOLI) – Bispu Dioseze Maliana, Don Norberto do Amarál, subliña katak infidelidade iha kazamentu mak kauza prinsipál sira ba ruptura família no ba futuru lori sofrimentu ba labarik sira.
Bispu Norberto hato’o bainhira prezide selebrasaun eukarístika Festa Sagrada Família iha Dioseze Maliana, ne’ebé hetan partisipasaun husi sarani sira husi parókia oioin.
Iha nia omília, Bispu Maliana dehan igreja kaer Santa Família, Jezús, Maria, no José—nu’udar ezemplu moris ba família sarani hotu. Hodi konvida sarani sira atu banati tuir José nia fidelidade hodi rona Maromak nia liafuan, halo tuir Ninia hakarak, no fiar tomak iha Maromak nia planu.
Tuir bispu, realidade moris familiár ohin loron nian, ne’ebé marka ho infidelidade, separasaun, no enfrakesimentu responsabilidade matrimoniál no ho situasaun ne’e la’ós de’it hakanek kaben-na’in, maibé estraga mós oan sira-nia futuru.
Notísia relevante: Don Norberto prezide Peregrinasaun Aniversáriu Internasionál ba Aparisaun dalimak iha Fátima
“Ohin loron ita susar boot, fen ou la’en, halai tun-sa’e, soe hela fen sira. Ita la hatene fen sira atu halo saida, tutur liman ba ulun mak dehan susar-boot, fen hira mak tanis, depois la’en hira mak laran-susar haree fen sira selingkuh. Ita atu bá ne’ebé? Fó ezemplu ba oan sira ne’ebé foin moris mai la di’ak, estraga tiha fámilia ida-ne’e sai aat loos. Oan sira ne’ebé husik hela, aman-inan sira la tau-matan”, nia hateten.
Saserdote ne’e fó hanoin ba inan-aman katak sira hetan bolu atu tau matan, proteje, no eduka oan sira, nune’e sira bele buras iha valór sira fiar nian, kompaixaun no responsabilidade nian.
“Husu ba la’en sira atu hadomi no respeita sira-nia fen, enkuantu fen no la’en sira hetan enkorajamentu atu harii armonia entre hanoin no sentimentu sira iha família laran”, realsa.
Bispu Maliana mós husu ba sarani sira atu tau atensaun ba sira-nia atitude no liafuan sira, inklui sira-nia utilizasaun ba mídia sosiál, nune’e labele hakanek ema seluk, liuliu membru família rasik.
Don Norberto fó hanoin ba labarik sira atu halo tuir aman no inan ho fuan nakloke no simu inan-aman nia konsellu nuʼudar parte ida husi moris fiar nian.
Bispu konvida sarani hotu atu hafoun an hodi rona Maromak nia liafuan, tuir Ninia planu, no fiar iha Maromak nia grasa, ne’ebé fó kbiit ba família sarani sira atu nafatin hamutuk iha dezafiu oioin nia leet.
“Família sira ne’ebé harii iha fiar, fidelidade, no domin sei sai fonte esperansa nian ba Kreda no sosiedade”, konklui
Notísia relevante: Don Norberto: “Tenke hatene agradese ba ema-ne’ebé ajuda ita”
Jornalista: Sergio da Cruz
Editora: Maria Auxiliadora
