OEKUSI, 27 Janeiru 2026 (TATOLI) – Agrikultór Davis Sasi, husi suku Nípani sub-rejiaun Pante Makasar Rejiaun Administrativa Espesiál Oekusi Ambeno (RAEOA), preokupa tanba peste lakataru estraga sira-nia batar iha to’os.
Tuir nia, kuaze semana rua ona, peste ataka maka’as batar sira, halo batar nia tahan sai namlaek, tanba ne’e nia rekomenda ba serbisu agrikultura Oekusi presiza tau matan.
“Ha’u-nia to’os iha Bausiu ne’ebá iha Sakato mós iha, ohin ha’u mai haree ida Sakato ne’e, peste ataka maka’as ona, problema ne’e, la’ós ha’u mesak maibé ami barak, peste ataka primeiru ba batar nia tahan nurak ne’e, lakleur sai namla’ek, ne’ebé ami husu ba agrikultura sei bele apoia ami, tanba batar sira agora besik atu funan ona, maibé ita haree tahan namla’ek, sei ida-ne’e ita husik de’it, signifika ita serbisu kolen saugate de’it,” nia hateten iha suku Nípani, ohin.
Notísia relevante:RAEOA introdús pestisida orgániku atua Lakataru
Hatan ba preokupasaun ne’e, Diretór Diresaun Rejionál Agrikultura Oekusi, José Oki, rekoñese, la’ós suku Nípani de’it, maibé kuaze suku barak mós preokupa.
Tanba ne’e, parte Diretór Diresaun Rejionál Agrikultura Oekusi, sei koordena ho tékniku sira oinsá bele atua, tanba ai-moruk iha diresaun sufisiente.
“Ita-nia agrikultór sira barak mak hateten balun funsionáriu mós preokupa ba problema peste ne’e. Liga ho problema ne’e, Diretór Diresaun Rejionál Agrikultura, iha responsabilidade, agora daudaun ita iha ai-moruk sufisiente atu bele kombate, ne’ebé ami sei koordena ho tékniku sira liu-liu estensionista suku sira tau identifika suku ne’ebé mak ataka barakliu”.
Notísia relevante:MAP kapasita estensionista RAEOA maneira salva ai-han hosi peste lakataru
Jornalista: Abílio Elo Nini
Editór: Rafael Ximenes de A. Belo
