DILI, 21 Fevereiru 2026 (TATOLI)—Advogadu privadu ne’ebé fó defeza ba sidadaun Xineza na’in-18, Octávio Cardoso, lamenta ho ekipa konjunta nia atuasaun halo buska no apreensaun ba nia kliente sidadaun Xineza na’in-18 iha rezidénsia ida iha Fomentu, Komoro, Postu Administrativu Dom Aleixo, Munisípiu Dili, iha sesta (20 Fevereiru) kalan ne’e tanba lahó mandadu judisiál.
Tuir Octavio, atuasaun ne’e la kumpre ba prosedimentu legál no andamentu prosesuál tanba molok autoridade sira halo atuasaun hodi halo buska no apreensaun ne’e tenke aprezenta mandadu buska no apreensaun husi Tribunál.
“Primeiru hanesan advogadu ba iha prosesu ne’e, liuliu haree ba iha parte prosesuál ne’ebé mak ha’u sente duvida ba iha maneira atuasaun halo husi ekipa Polísia mai iha ita-nia rezidénsia ne’e, tanba la tuir prosedimentu legál ne’ebé iha tanba buska ida-ne’e laiha mandadu husi Tribunál,” Octávio Cardoso hateten ba jornalista sira liuhusi konferénsia imprensa iha Fomentu, Sábadu ohin.
Nia dehan, fatin ne’ebé ekipa konjunta sira halo buska no apreensaun ne’e rezidénsia, purtantu iha oras ka tempu ema ida atu ba tama iha uma laran atu passa revista, asegura sasán, halo apreensaun, iha Kódigu Prosesu Penál ne’e prevee katak tenke iha mandadu buska apreensaun ne’ebé mak husi Tribunál.
Tuir Kódigu Prosesu Penál Artigu 170.º hateten kona-ba buska iha domisíliu katak.
Bbuska iha uma ne’ebé ema hela ka nia dependénsia fexada bele halo de’it husi tuku neen dadeer to’o tuku ualu kalan, salvu artigu seginte, nº 2, nia dispozisaun.
“Maibé ekipa sira mai iha kazu ida-ne’e sira mai ho razaun katak ne’e hanesan flagante de litu. Atu ko’alia flagante de litu maibé ita-boot sira rasik akompaña katak sasán sira-ne’ebé mak halo apreensaun atuál ida-ne’e laiha evidénsia balun ne’ebé mak iha indikasaun katak atividade ne’e la’o hela ka halo hela instalasaun,” Cardoso fundamenta.
Advogadu ne’e hateten, iha kazu ida-ne’e laiha indisiu ne’ebé mak bele halo sira atu ultrapassa ka tama iha rezidénsia abitante ida nain tanba laiha mandadu tribunal hodi halo uma-na’in sira mós la satisfas.
“Ita amostra, ita-nia maneira atuasaun liuliu hanesan reprezenta instituisaun Estadu Timor-Leste tenke hatudu ita-nia profisionálizmu hodi servisu tuir Kódigu ne’ebé mak regula,” nia afirma.
Nia hatutan, ba kazu ida-ne’e ema-nia sasán na’in mós seidauk loke, tantu atu instala mós seidauk nia sei arma hamutuk hela.
“Sé mak lakohi atu koopera sé uma-ves katak ita iha ona deskonfia. Maibé ha’u nafatin dehan labele tanba buat hotu-hotu ita labele konsidera katak ida-ne’e nia faktu ne’ebé mak atu kabe ba krime imputa ba sira l iha ne’e, ita labele analojia. Ne’e Leí bandu, ita labele hateten katak ema ida komete krime,” Octavio esklarese.
Nia dehan, hanesan advogadu abitualmente prosesu normál ne’ebé mak akompaña aleinde ida-ne’e halo defeza ba kliente nafatin fó pareser informalmente liuhusi Konferensia Imprensa ne’e.
“Atu loke no fó hanoin bá pesoal ho dirijente sira-ne’ebé mak lidera ekipa halo atuasaun iha terenu nune’e halo atuasaun tenke prosedimentu legal,” nia dehan.
Jornalista : Natalino Costa
Editór : Cancio Ximenes
