BAUKAU, 03 Jullu 2026 (TATOLI)–Iha Sesta ne’e, purvolta tuku 08:00 Otl, ahi han labarik ida no uma-ida iha área Berkoli, Suku Uma Ana-Iku, Postu Administrativu Venilale, Munisípiu Baukau.
Insidente ne’e akontese bainhira xefe família, ne’ebé ho profisaun motorista, ba servisu no feen-kaben ba asiste jogu Kopa Mundiál entre Portugál kontra Kroásia, no husik hela oan, ne’ebé ho tinan tolu, iha uma referidu. Inséndiu ne’e, alegadamente, kauza husi sirkuitu elétriku.
Tuir Komandante Operasaun Autoridade Protesaun Sivíl (APC-sigla Portugeza), Francisco Viana, inséndiu alastra ho lalais, nune’e ahi han uma tomak ho sasán sira iha laran, inklui dokumentu ho osan.
Enkuantu, labarik ne’ebé ho naran Leonatan Freitas hetan kanek iha parte liman, ain, kotuk laran, kabun no ulun tanba ahi han. Oras ne’e dadaun, vítima halo tratamentu iha Ospitál Rejionál Eduardo Ximenes (HoREX-sigla portugeza).
APC hetan kontaktu husi komunidade ne’ebé haree inséndiu ne’e, orienta kedas korpu bombeiru dezloka ba fatin akontesimentu hodi evita ahi alastra ba viziñu sira-nia uma. Bainhira ekipa to’o iha terrenu, komunidade lori ona vítima bá unidade saúde.
“Alin kanek ne’e ita-nia ekipa bá tuir sentru saúde maibé sira transporta tiha ona bá ospitál, tanba nia kondisaun grave uitoan,” Francisco Viana hateten iha ninia kna’ar fatin, Vila Antiga, Baukau, Sesta ne’e.
Nia informa APC fó ona apoiu emerjénsia ba vítima inséndiu, hanesan hahán no sasán koziña nian.
Jornalista: Natalino Belo
Editór: Xisto Freitas da Piedade
