Governu aprova Rejime Karreira Jerál Administrasaun Públika iha 2026
DILI, 05 Agostu 2026 (TATOLI)—Iha reuniaun Konsellu Ministru, kuarta ne’e, Governu aprova proposta Rezolusaun Governu, ne’ebé aprezenta husi Komisaun Funsaun Públika, ne’ebé estabelese vaga ba promosaun pesoál Rejime Karreira Jerál Administrasaun Públika iha tinan 2026.
Notísia Relevante: Governu deside suspende rekrutamentu funsionáriu públiku no kontrata traballadór kazuál
Rezolusaun Governu ne’e estabelese ba tinan 2026 ho totál vaga 276 ba promosaun funsionáriu sira-ne’ebé integra iha karreira rejime jerál Administrasaun Públika, ne’ebé korresponde ba porsentu lima husi totál traballadór sira-ne’ebé prienxe kritériu promosaun iha grau profisionál ida-idak.
Vaga sira ne’e fahe tuir hanesan 30 ba Tékniku Superiór, Grau A, 62 ba Tékniku Superiór, Grau B, 82 ba Tékniku Profisionál, Grau C, 74 ba Tékniku Profisionál, Grau D, 26 ba Tékniku Administrativu, Grau E no tolu (3) ba Asistente, Grau F.
Rezolusaun ne’e mós determina alokasaun verba ho montante $1.172.860,20, ne’ebé sei uza hodi kobre despeza sira-ne’ebé mosu tanba promosaun, hodi kontribui ba valorizasaun karreira funsionáriu públiku sira no hametin kapasidade no motivasaun Administrasaun Públika nian.
Promosaun ne’ebé hatuur iha Rezolusaun Governu ne’e sei hahú vigora iha loron 1 fulan-Janeiru tinan 2027.
Jornalista : Alexandra da Costa
Editór : Cancio Ximenes
