Autoridade Vikeke fó ultimatu ba negosiante sira iha merkadu antiga muda bá merkadu Olobai
VIKEKE, 12 Agustu 2026 (TATOLI)—Prezidente Autoridade Munisípiu Vikeke, Kinta ne’e, hala’o enkontru ho ekipa traballu ne’ebé prepara muda negosiante sira-ne’ebé fa’an sasán iha merkadu antiga Vikeke Vila, Vikeke, muda bá merkadu foun Olobai, Suku Karaubalu.
Objetivu husi sorumutu atu prepara forsa traballu no fasilidade sira bainhira negosiante sira-ne’ebé okupa iha merkadu antiga lakoi muda, ekipa sei tun muda orbrigatória no sei halo mamuk fatin sira-ne’ebé negosiante sira uza halo negósiu.
Antes ne’e, Autoridade Munisípiu Vikeke nomeia ona Sekretáriu Asuntu Sosial no Organizasaun, Acásio de Sousa, sai koordenadór hodi lidera ekipa traballu muda negosiante sira ba merkadu foun
Prezidente Autoridade Munisípiu Vikeke, Francisco C. S. de G. Soares, hateten autoridade Munisípiu Vikeke sei fó apoia tomak ba ekipa sira hodi hala’o sira-nia servisu mobiliza negosiante sira bá merkadu foun.
“Tempu ne’ebé fó ba negosiante sira-ne’e durante loron-sanulu (10) ne’e muda ona ba merkadu foun. To’o loron 23 fulan-Agustu ne’e Eletricidade de Timor-Leste, Empreza Públika (EDTL, E.P.) hamate eletrisidade liga ba merkadu antiga nian. Nune’e, loron 24 Agostu ita-nia ekipa sei tun bá merkadu antiga. Karik negosiante sira la muda ekipa sei hasai sira ho obrigatóriu. Tanba ita fó tempu ba sira muda no loron ultimatu mak iha loron 23 Agustu,” Francisco hateten iha salaun Administrasaun Munisípiu Vikeke, Kuarta ne’e.
Autoridade Munisípiu Vikeke ne’e husu Polísia Nasionál Timor-Leste (PNTL) Munisípiu Vikeke bainhira ekipa EDTL tun halo servisu hamate liña eletrisidade iha área merkadu antiga nian membru PNTL sira tenke tun hamutuk ho ekipa sira hodi asegura ekipa sira hala’o sira-nia servisu.
Iha fatin hanesan, Koordenadór Muda Negosiante, Acásio de Sousa, haktuir ekipa sei kumpri orientasaun ne’ebé autortidade entrega nune’e liuhusi sorumutu ida-ne’e ekipa fahe tarefa servisu ba malu hodi ezekuta orden ne’ebé iha hodi implementa iha terrenu.
Nia dehan ekipa traballu ne’e envolve husi funsionáriu sira husi kada diresaun sira-ne’ebé eziste iha Munisípiu Vikeke hamutuk na’in-47 no transporte unidade ualu (8) hodi apoia ba muda negosiante sira.
Tuir dadus, husi Diresaun Jestaun Merkadu no Turizmu Munisípiu Vikeke ne’ebé rejista negosiante ne’ebé hala’o negósiu hamutuk 89 ne’ebé durante ne’e fa’an produtu lokál, modo, vestuáriu roupa, roupa OB, kioske no seluk tan.
Partisipa iha enkontru koordenasaun muda negosiante ne’e hetan partisipa husi diretór kada diresaun sira iha Munisípiu Vikeke, Komadante Operasaun PNTL Munisípiu Vikeke, Autoridade Protesaun Sivíl (APC-sigla portugeza) no Autoridade Postu Vikeke Vila.
Jornalista: Vitorino Lopes da Costa
Editór: Xisto Freitas da Piedade
