Husi Dili bá Pekín: Povu nia osan mout, manu-ain sira tenke ke’e tuir to’o abut (IV)

DILI, 13 Agostu 2026 (TATOLI)—“Han de’it saida maka iha ita-nia bikan laran, labele bá han tan povu nian”. Lia-tatoli be nafunan husi Ex-Prezidente Repúblika, Francisco Guterres Lú Olo ne’e la’ós lia-menon mamuk de’it, maibé fanu ema hotu atu jere povu nia rikusoin (osan) ho kuidadu. Labele liman-lais haloot povu nia osan ho oin-midar ba midar, basá povu maka na’in ba osan no povu mehi atu osan ne’e bele haburas sira-nia futuru.

Atu kontrola povu nia rikusoin (osan), la’ós Komisaun Antí Korrupsaun (KAK) no sosiedade sivíl nia kna’ar de’it. Jornalista (manu-ain) mós hola-parte ba kna’ar importante ida-ne’e. Maibé, só ema hatene dalan. Dalan atu kontrola rikusoin ho maneira jornalizmu nian la’ós buat ida fásil. Jornalista ida atu to’o iha nivel ida-ne’e tenke iha bukae (koñesimentu) ne’ebé kle’an.

Ha’u ho kolega jornalista sira seluk husi Timor-Leste maski ho tempu badak de’it, hetan oportunidade kmanek ida (formasaun) ligadu ho asuntu korrupsaun, iha Pékin (Xina). Iha sesaun formasaun ne’ebé hala’o iha 19 Jullu 2026, ami aprende oinsá jornalista sira lee lia-loos ne’ebé subar iha eventu ida nia kotuk. Iha sesaun ida-ne’ebé hato’o hosi Li Yang, Formadór no Diretór hosi Eskritóriu Redasaun China Daily nian, korrupsaun maka kestaun ida-ne’ebé hatudu katak jornalizmu la para iha saida maka mosu iha ita-nia oin. Iha númeru orsamentu sira-nia kotuk, projetu, desizaun ofisiál sira, no mós kontratu Governu nian, sempre iha posibilidade seidauk detetadu.

Notísia relevante: Husi Dili bá Pekín: Wainhira Klima iha mudansa, manu-ain labele sai lian-laek (Parte III)

Korrupsaun dalabarak la manifesta an ho lian maka’as. Ida-ne’e dolar-tama ho nonook-uit liuhosi meza eskritóriu nia okos, dokumentu sira, asinatura sira-ne’ebé repete, empreza sira-ne’ebé manán projetu sira ho derrepente, ka orsamentu sira-ne’ebé lakon neineik hosi objetivu inísiu. Tanba ne’e, atu komprende korrupsaun presiza lori tempu. Jornalista sira presiza metikulozu, korajen, pasiénsia, no abilidade atu husu pergunta sira: osan povu nian bá ne’ebé, sé maka hetan benefísiu, no sé maka ikusmai resposabiliza ba prejuizu?

Hanesan ko’alia ba loos mai loos karik, korrupsaun maka ema ida foti-subar osan Estadu iha jestaun ba fundu públiku. Wainhira uza sala fundu públiku, dezenvolvimentu bele sofridu. Estrada sira-neʼebé tuir loloos tenke halo tuir padraun neʼebé diʼak bele sai aat lalais deʼit. Fasilidade saúde no edukasaun bele falta rekursu. Programa sosiál sira la konsege to’o bá komunidade ne’ebé tuir loloos sira maka merese atu hetan benefísiu. Ikusmai, sosiedade maka tenke selu fali nia efeitu husi ema liman-lais sira-nia hahalok.

Liután, korrupsaun estraga konfiansa públiku nian. Nasaun ida la’ós de’it harii hosi edifísiu Governu nian, estrada sira, eskola sira, ka ospitál sira. Nasaun ida harii husi konfiansa povu nian ba instituisaun. Wainhira públiku hahú persebe katak Governu nia desizaun bele sosa ho osan, lei bele hetan influensiada, no osan povu nian bele uza ba lukru privadu, ikusmai fundasaun morál Governu nian hetan estragu.

Iha-ne’e maka jornalista sira hala’o papél krusiál nu’udár kontrolu sosiál. Imprensa laiha autoridade atu fó kastigu ba koruptór sira, maibé sira iha kbiit atu fó-sai informasaun ba públiku. Reportajen jornalístika ida-ne’ebé hetan apoiu hosi dokumentu sira, dadus, sasin, no verifikasaun bele sai hanesan naroman ne’ebé fó roman ba espasu sira-ne’ebé nakukun.

Jornalizmu antí-korrupsaun la’ós de’it serbisu ida atu buka funsionáriu ka ukun-na’in sira-nia sala. Ne’e serbisu ida atu buka lia-loos bazeia ba faktu sira. Jornalista sira tenke hatene distinge entre akuzasaun no evidénsia, entre alegasaun no faktu, no entre interese públiku no interese pesoál.

Atu investiga alegasaun korupsaun, jornalista sira presiza hahú ho pergunta simples. Orsamentu hira? Sé maka jere ida-ne’e? Sé maka simu kontratu? Oinsá prosesu aprovizionamentu ne’e hala’o? Serbisu ne’e tuir orsamentu? Sé maka hetan benefísiu? No oinsá komunidade hetan afetada?

Pergunta sira-ne’e depoiz lori jornalista sira atu aprofunda liután iha dokumentu sira, dadus orsamentu nian, relatóriu auditoria nian, kontratu aprovizionamentu nian, desizaun Governu nian, rejistu empreza nian, no sasin sira. Jornalista sira labele hamriik de’it iha odamatan oin ba asuntu ida. Atu komprende saida maka akontese iha kotuk, sira tenke nani kle’an liután atu investiga—loke odamatan ba informasaun, ezamina informasaun faktuál hotu-hotu, no kompara saida maka hakerek ho realidade iha terrenu.

Iha prosesu ida-ne’e, prinsípiu ‘Follow the Money’/Buka Tuir Osan maka aprosimasaun ida-ne’ebé krusiál. Osan povu nian husik hela ain-le’ut ida. Bainhira projetu boot ida implementadu, klaru katak tanba iha orsamentu atu finansia, kontratu, empreza, pagamentu, serbisu fíziku, no benefisiáriu sira. Atu hakat-tuir ho kuidadu ba dalan ida-ne’e, jornalista sira bele deskobre diskripánsia sira-ne’ebé karik la aparente iha reportajen regulár.

Maibé, aten-brani deʼit la toʼo. Investigasaun jornalístika sira presiza verifikasaun. Akuzasaun hotu-hotu tenke iha fundamentu. Númeru hotu-hotu tenke verifikadu. Fonte hotu-hotu tenke hetan konfirmasaun. Tenke fó oportunidade ba arguidu atu fó esplikasaun. Ho maneira ida-ne’e, jornalizmu la sai hanesan espasu julgamentu nian, maibé dentru kumprimentu ba lia-loos.

Tuir Lin Yang, Timor-Leste hanesan nasaun ki’ik no nasaun sub-dezenvolidu ida, kna’ar ida-ne’e sai krusiál liután ba jornalista timoroan sira. Nu’udár nasaun ida-ne’ebé kontinua dezenvolve instituisaun, infraestrutura, ekonomia, edukasaun, no servisu públiku, jestaun rekursu Estadu tenke hetan atensaun públika no mídia. Fundu públiku hotu-hotu esensialmente hanesan konfiansa ida-ne’ebé tenke fó fila bá povu.

Tanba ne’e, jornalista Timor-Leste presiza haree korrupsaun la’ós de’it nu’udár notísia wainhira funsionáriu ka governante ida hetan kapturasaun. Tenke haree korrupsaun nu’udár prosesu ida-ne’ebé bele akontese kle’ur molok kazu ruma to’o iha tribunál. Iha poténsia ba irregularidade ne’e akontese iha planeamentu, orsamentasaun, konkursu, implementasaun projetu, no pagamentu. Iha etapa idaidak, iha espasu ba jornalizmu atu husu pergunta no hala’o fiskalizasaun.

Jornalista ida-ne’ebé servisu ba interese públiku labele husu de’it, “Saida maka akontese?” Sira presiza hakat dook liután ho pergunta sira: “Tanbasá ida-ne’e akontese? Osan tama sé nian kohe ka sé maka hetan benefísiu? Sé maka hetan prejuízu? Evidénsia saida? No impaktu saida ba sosiedade?”

Ne’e maka pergunta sira-ne’ebé transforma notísia baibain ba jornalizmu ne’ebé kle’an liu. Ikusmai, luta hasoru korrupsaun la’ós de’it responsabilidade hosi ajénsia sira-ne’ebé aplika lei. Governu ezijidu kria sistema ida-ne’ebé transparente, fiskalizasaun ne’ebé forte, públiku ida-ne’ebé krítiku, no mídia ida-ne’ebé independente no profisionál. Jornalista sira hamriik entre informasaun no sosiedade—halo ligasaun ba faktu naksubar sira ho direitu públiku nian atu hatene.

Rezultadu husi formasaun ho Li Yang maka jornalizmu iha responsabilidade boot liu duké simplesmente prodús notísia. Jornalista maka públiku nia matan wainhira buat ruma naksubar hela, sai tilun ba lian-laek sira, no kakisuk nafatin ukun-na’in sira ne’ebé haluha an katak osan ne’ebe sira jere ne’e povu nia osan.

Diretór hosi Eskritóriu Redasaun China Daily nian ne’e enfazia katak korrupsaun bele la’o iha fatin nakukun ida nia okos, maibé jornalizmu tenke la’o ho naroman. Hetok jornalista sira buka tuir osan nia dalan ho kle’an liu, susar liu ba irregularidade sira atu subar an. No bainhira faktu sira fó-sai bá públiku ho aten-brani, akurásia no étika, imprensa kumpre ona ninia funsaun ida-ne’ebé importante liu: mantein kontrola podér-na’in sira nune’e poderozu sira nafatin iha públiku nia kontrolu.

Jornalista: Osória Marques

Editór: Xisto Freitas da Piedade