Sarani konsidera Preladu sira nunka husik povu iha situasaun difísil
DILI, 10 Setembru 2026 (TATOLI)—Iha misa ikus ba Preladu Katóliku sira iha Tasi-Tolu, Sarani Dioseze Baukau, António Bento Correia, hateten Preladu sira-ne’e nunka husik nia sarani sira iha tempu difísil nia laran.
“Ohin ami hamutuk atu mai tuir selebrasaun ba ita-nia Preladu Na’in-haat ninian, ne’ebé ohin atu ba haloot sira-nia restu mortál iha Igreja Katedrál Dili. Preladu sira-ne’e hadomi nia sarani sira. Maski iha situasaun difísil maibé sira nunka husik ita. Sira sempre akompaña nafatin ita, ho orasaun no vizita nia sarani sira. Tan ne’e mak sentimentu nu’udár sarani ami tuir nafatin bibi-atan ida, bibi-atan ne’ebé husik hela ita,” nia dehan iha Tasi-Tolu, Kinta ne’e.
António hatutan Dioseze Baukau prepara transporte mesak hodi tula sarani sira mai partisipa misa Preladu sira nian.
“Ami mai ho ami-nia parókia tomak. Parókia ne’e mai organizadu. Mai ho karreta ne’ebé sarani sira idaidak oferese no ajuda mós husi pároku, lori ami mai to’o iha-ne’e. Ami sai husi Baukau iha meiudia, tanba dehan tama iha Tasi-Tolu iha tuku 15:00,” nia haktuir.
Nia esplika bibi-atan na’in-haat ne’e bainhira Timor seidauk ukun-an, sira haklaken ona Na’i nia liafuan, evenjellu iha rai ne’e, ohin loron bele haree katak timoroan barak matenek ne’e maihusi sira-nia fini ne’ebé husik hela.
Nune’e mós, Sarani hosi Parokia Ossú, Dória Maria Carvalho, sente kontente hodi partisipa misa ba Preladu Na’in-haat nian iha Tasi-Tolu.
“Nu’udár joven ida sente kontente tanba ho sira-nia dedikasaun tempu uluk nian liuhusi sira-nia misaun Igreja Katólika nian hodi anima sarani, nune’e ohin mai presta omenajen no hasa’e orasaun ba Preladu sira,” nia dehan.
Dória hateten hanesan sarani no joven maski dook maibé hakarak partisipa iha loron importante no istóriku ida-ne’e.
“Maski dook mós ha’u hakarak mai tuir misa iha-ne’e tanba ohin ne’e misa tinan rua ba vizita Amu Papa iha Timor no misa ikus ba Preladu sira,” nia Dória subliña.
Iha sorin seluk, Sarani Agusta da Silva husi Parókia Bekora, konsidera Preladu sira mós kontribui ba prosesu libertasaun nasionál.
“Ha’u-nia sentimentu ne’e kle’an tebes ba Preladu sira tanba sira kontribui mós luta ba nasaun ida- ne’e nia ukun-rasik an. Sira mós halo buat barak ba nasaun ida-ne’e, ne’ebé ha’u sente tenke hato’o agradesimentu ba sira,” nia dehan.
Jornalista: Osória Marques
Editór: Xisto Freitas da Piedade
