AIFAESA sei destaka funsionáriu iha Vikeke kontrola produtu merkadu no loja
VIKEKE, 23 Setembru 2026 (TATOLI)—Diretora Servisu Munisipál Jestaun Merkadu no Turizmu (SMGMT) iha Munisípiu Vikeke, Mirandolina Fátima da Costa Guterres, hateten Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P.) sei destaka funasionáriu iha Munisípiu Vikeke hodi apoiu SMGMT no Seguransa Alimentár kontrola produtu sira iha merkadu no loja sira.
“Foin lalais ne’e ekipa AIFAESA destakadu Baukau mai halo koordenasaun ona ho autoridade hodi koloka ekipa AIFAESA mai Munisípiu Vikeke. Nune’e, ba kordenasaun entre ekipa AIFAESA ho autoridade, loos ona. Ne’ebé, ekipa bá fali ona Baukau depoiz mak mai fali Vikeke,” Mirandolina Fátima ba TATOLI, iha Postu Vikeke, Kuarta ne’e.
Diretora SMGMT ne’e hatutan ekipa AIFAESA destaka mai Vikeke parte ida apoiu ona vendedór sira labele monopóliu presu sasán no sasán sira-ne’ebé liu prazu fa’an ba konsumidór sira.
Nia relata ekipa AIFAESA husi rejiaun Baukau ne’ebé atu destaka ba Munisípiu Vikeke hamutuk na’in-sia (9) hodi apoia ba Diresaun GMT no Seguransa Alimentár.
Jornalista: Vitorino Lopes da Costa
Editór: Xisto Freitas da Piedade
