Vise PM Kalbuadi Lay sei reprezenta Timor-Leste hodi asina Akordu DEFA iha Manila

DÍLI, 30 Setembru 2026 (TATOLI) — Konsellu Ministru (KM) delibera hodi fó podér tomak ba Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, atu reprezenta Timor-Leste hodi asina Akordu-Kuadru ASEAN kona-ba Ekonomia Dijitál (DEFA), iha Manila, Filipina.

Sekretáriu Estadu Komunikasaun Sosiál, Expedito Loro Dias Ximenes, fó sai katak asina akordu ne’e sei hala’o iha fulan-Novembru 2026.

Objetivu husi Akordu DEFA ne’e mak atu promove ekosistema ekonomia dijitál ASEAN ne’ebé integradu, liuhosi armonizasaun norma no prosedimentu entre nasaun membru ASEAN sira.

Akordu ne’e abranje área importante sira, inklui komérsiu no pagamentu eletróniku, identidade dijitál, protesaun dadus, siberseguransa no intelijénsia artifisiál.

Enkuantu, Ministru Komérsiu no Indústria, Nino Pereira mós sei lori Timor-Leste nia naran atu asina Akordu-Kuadru ASEAN kona-ba Konkorrénsia (AFAC).

AFAC estabelese kuadru rejionál kooperasaun nian ida kona-ba matéria konkorrénsia, ne’ebé bazeia ba aplikasaun ne’ebé justa, transparente no la iha diskriminasaun ba regra sira, reforsu instituisaun responsavel ba konkorrénsia, no mós kooperasaun entre nasaun membru ASEAN.

Jornalista: Alexandra da Costa
Editór: Filomeno Martins