Governu kolleta ikan nila rihun 20 husi grupu juventude Raifun
BOBONARU, 02 Outubru 2026 (TATOLI) – Ministru Juventude, Desportu, Arte no Kultura (MJDAK), Nelyo Isaac Sarmento, kolleta ikan nila hamutuk rihun 20 ne’ebé haki’ak husi Grupu Juventude Kriativu Raifun, iha mota Bulobu, Suku Raifun, Postu Administrativu Maliana, Munisípiu Bobonaru.
Nelyo Isaac hatete husi inisiativa juventude Raifun nian hatudu katak agrikultura, inklui haki’ak ikan, iha poténsia boot atu kontribui ba dezenvolvimentu ekonomia família no nasaun.
“Programa ida-ne’e hahú husi programa empreendedorizmu juventude, ne’ebé fó oportunidade ba grupu juventude ho poténsia atu dezenvolve sira-nia atividade no serbisu ba sira-nia an. Liuhusi Sentru Juventude, sira hetan asesu ba formasaun no fundu”, ministru dehan iha intervensaun ba atividade referida.
Nia afirma katak Governu mós sei kontinua orienta Sentru Juventude atu fó formasaun adekuada ba joven sira kona-ba téknika haki’ak ikan, jestaun produtu, administrasaun no asesu ba merkadu, atu atividade sira bele dezenvolve di’ak.
Governante ne’e salienta atividade ne’e mós parte ida atu kontribui no responde ba implementasaun Programa Merenda Eskolár atu hadi’a estudante sira nutrisaun no dezenvolve sira-nia kreximentu.
“Ikan nila iha proteína di’ak no bele sai fonte nutrisaun ba labarik sira, labarik sira konsumu beibeik bele hadi’a sira-nia intelijénsia” nia dehan.
Nia hato’o mós ba juventude Raifun atu aproveita potensia área ne’ebé besik mota hodi dezenvolve atividade seluk, hanesan kuda modo, tomate, ai-manas no batar.
“Alin joven sira iha ne’e hatene identifika poténsia ekonómika Timor-Leste iha agrikultura. Dalaruma ita hotu-hotu hakarak hafodak lalais, nabilan lalais, maibé loloos hakarak ita-nia ekonomia forte ne’e mak mai husi parte agrikultura, liuliu natar, to’os, haki’ak animál no ikan”, nia salienta.
Prezidente Autoridade Munisípiu (PAM) Bobonaru, Paulo Moniz Maia, hatete katak inisiativa Grupu Juventude Kriativu Raifun bele sai ezemplu ba juventude sira seluk atu aproveita poténsia lokál no kria atividade ekonomia iha sira-nia suku.
“Se juventude laiha inisiativa, oinsá mak ekonomia bele buras iha ita-nia suku. Inisiativa juventude ne’e la’ós de’it haki’ak ikan, maibé buat barak bele hamosu bainhira iha kriatividade no vontade atu halo atividade ekonomia”, nia dehan.
Governante ne’e apea juventude atu iha korajen no persisténsia bainhira hasoru dezafiu, no aproveita poténsia rai Timor-Leste nian hodi kria oportunidade serbisu iha rai rasik.
“Juventude hotu-hotu atu halo atividade saida de’it ligadu ho ekonomia ne’e dalan nakloke tanba Timor-Leste ne’e nasaun. Joven barak liu hakarak bá rai-li’ur buka serbisu, tansá ita la halo iha ita-nia rai”, nia dehan.
Koordenadór Grupu Juventude Kriativu Raifun, Januário Soares Tavares, hatete katak grupu ne’e harii iha 2020 ho membru na’in-sia, kompostu husi mane hitu no feto rua.
Nia esplika katak grupu ne’e hahú ho tanke ikan rua no haki’ak ikan hamutuk 2.000. Ho apoiu no akompañamentu husi Sentru Juventude Bobonaru.
Daudaun ne’e, grupu konsege aumenta tanke to’o sia, ho kapasidade ikan hamutuk rihun 20.
“Durante ami-niq atividade la fásil. Iha tempu ami monu, maibé hanesan juventude ami tenke kontinua. Ami iha planu atu aumenta tan kolam, maibé ami hasoru dezafiu, tanba kolam sira sei uza sistema manuál no ami mós falta mákina atu fó hahán ikan” nia dehan.
Januário husu ba Governu atu konsidera apoiu ba grupu, liuliu ekipamentu atu prosesu hahán ikan, tanba folin pakan ikan karun no aumenta kustu produsaun.
Notísia relevante: VPM Assanami kolleta Ikan Nila hamutuk 9.425 husi Grupu Akuakultura Lotan
Nia mós husu ba Governu atu halo medida protesaun iha mota Bulobu, liuhusi konstrusaun bronjong, atu prevene risku bee mota ne’ebé bele estraga área tanke ikan sira.
Xefe Suku Raifun, Domingos Salvador, solisita ba Governu atu kontinua apoia grupu ne’e, liuliu fornese mákina atu dulas no prepara hahán ikan, tanba sira sei sosa pakan ho folin aas.
Nia mós husu apoiu ba hadi’a kondisaun tanke sira, atu ajuda grupu ne’e kontinua dezenvolve atividade haki’ak ikan iha suku Raifun.
Enkuantu Ikan referida grupu Joventude Kriativu fa’an kada kilógrama ho presu $5.
Notísia relevante: Ministériu Agrikultura sei fornese ikan tonelada ba Programa Merenda Eskolár iha Bobonar
Jornalista: Sergio da Cruz
Editora: Maria Auxiliadora
