PAM Bobonaru suspende kontratu ho MOKATIL atu hadi’a jestaun merenda eskolár
BOBONARU, 07 Outubru 2026 (TATOLI) – Prezidente Autoridade Munisípiu (PAM) Bobonaru, Paulo Moniz Maia, deside hapara temporariamente kontratu ho Asosiasaun Movimentu Kamponezes Timor-Leste (MOKATIL) ne’ebé fornese produtu ba merenda eskolár iha munisípiu ne’e, tanba avaliasaun kona-ba kualidade no kuantidade ai-han seidauk tuir espetativa.
Paulo Moniz Maia hatete katak desizaun envolve MOKATIL iha fornesimentu ai-han merenda eskolár bazeia ba orientasaun Primeiru-Ministru Xanana Gusmão ne’ebé prioritiza produtu lokál, inklui produtu “Bafo Kayrala” iha Programa Merenda Eskolár.
Paulo observa katak durante fulan rua ba implementasaun programa ne’e identifika problema balun iha distribuisaun ba kualidade no kuantidade ai-han merenda eskolár, inklui modo-tahan ne’ebé namlaek no hahán la sufisiente.
“Iha realidade, serbisu ne’e seidauk másimu, modo-tahan namlaek, hahán mós la sufisiente no buat sira ne’e seidauk di’ak. Tanba ne’e, ha’u fó kontratu ba fulan rua, Agostu no Setembru, no agora ha’u sei hapara kontratu”, nia informa iha salaun postu administrativu Kailaku, ohin.
Ho suspensaun kontratu ba MOKATIL, daudaun Ekipa Jestaun Programa (EJP) mak kontinua fornese no jere merenda eskolár iha munisípiu Bobonaru.
Paulo Moniz Maia hatete katak desizaun ne’e la’ós atu taka dalan ba MOKATIL, maibé fó oportunidade ba asosiasaun to’os-na’in atu hadi’a ninia jestaun, ekonomia no responsabilidade.
“Iha fulan rua tolu tan ou tinan oin mai ha’u bele bolu filafali, más se nia la hadi’a an ha’u sei kontinua ho EJP, tanba uluk la’o ho di’ak agora tan de’it atu fornese Bafo Kayrala ne’e mak ha’u bolu MOKATIL”, nia afirma.
Notísia relevante: MOKATIL la kumpre kritériu ijiene no seguransa ai-han ba PME
Tinan ne’e, Bobonaru hetan alokasaun orsamentu anuál ba Programa Merenda Eskolár ho totál millaun $1,8 hodi ezekuta ba loron efetivu 100-resin. PME tinan letivu ne’e implementa iha Pré-Eskolár Públiku 42, Ensinu Báziku Sentrál Públiku no filiál 137, Ensinu Pré-Eskolár Katólika Privadu sia no Ensinu Báziku Katóliku Privadu 16.
Totál estudante benefisiáriu programa ne’e hamutuk 30.178, kompostu husi Pré-Eskolár Públiku 2.494, Ensinu Báziku Públiku 24.961, Ensinu Pré- Eskolár Katóliku Privadu 471 no Ensinu Báziku Katóliku Privadu 2.252.
Notísia relevante: Estudante 458 iha EBC Atuaben la hetan merenda eskolár tuir menu indikativu
Jornalista: Sergio da Cruz
Editora: Maria Auxiliadora
