Xanana husu jurista sira ezerse funsaun ho transparénsia no profisonál
DILI, 15 Outobru 2026 (TATOLI)—Primeiru-Ministru, Kay Xanana Gusmão, hala’o enkontru no husu jurista sira ba vaga Supremu Tribunál Justisa (STJ) atu ezerse sira-nia funsaun ho transparénsia no profisionál durante prosesu rekrutamentu.
Komisária ba Komisaun Rekrutamentu no Selesaun Juíz Supremu Tribunál Justisa, Carmelita Caetano Moniz, hateten katak durante jurista internasionál sira husi Portugál ne’ebé fó ona teste ba konkorente STJ no Tribunál Rekursu nian, sira-ne’e mai Timor seidauk hasoru malu ho Primeiru-Ministru hodi kumprimenta, tanba ne’e durante ne’e Xefe Governu okupadu loos.
“Iha enkontru Xefe Governu hato’o apresiasaun ba ekipa jurista sira-nia servisu ne’ebé faze daruak nian ramata ona no agora atu hakat ba faze entrevista profisionál,” Komisária Juíz STJ ne’e informa ba joralista sira iha Palásiu Governu, ohin.
Nia dehan, enkontru ne’e atu fó esperansa ba malu, hakarak jurista sira halo servisu ho di’ak tuir prespetiva ne’ebé Estadu hakarak. Jurista sira mós komprometidu halo servisu ho di’ak tebes ba rai ida-ne’e.
“Primeiru-Ministru konfia tebes jurista sira-nia integridade, imparsialidade, independénsia ho kapasidade ne’ebé jurista sira iha hodi halo avaliasaun teste ne’e ho didi’ak atu hetan timoroan sira-ne’ebé kualifikadu ba ezerse sira-nia funsaun iha Supremu Tribunál Justisa (STJ),” nia haktuir.
Kandidatu vaga rekrutamentu Juiz STJ juri fó prazu loron 15 halo reklamasaun
Komisária ne’e hatutan kandidatu sira simu rezultadu teste eskrita ne’e iha loron segunda feira (09/10) liubá no fó tempu loron 15 atu sira halo rekursu ba desizaun provizóriu husi jurista sira
Teste ne’e iha maneira rua atu fó valór mak “aptu” no “la aptu”, signifika aptu ne’e husi valór neen (6) ba leten (pasa) no la aptu (la pasa) ne’e husi valór lima (5) mai kraik. Ne’ebé públiku labele deskonfia ida kona-ba rezultadu valór teste nian. Maibé sira iha direitu atu halo reklamasaun, hafoin ne’e mak jurista sira sei haree fali desizaun seluk.
“Ne’ebé, ida-ne’e la’ós buat foun ida no laiha diskriminasaun iha prosesu rekrutamentu STJ nian, jurista mós la koñese teknikamente konkorente sira-ne’e, entaun ita halo deskriminasaun husi ne’ebé. Ita afasta sira tanba sira-nia valór la to’o,” nia esplika.
Nia reforsa, valór sira labele tau iha rezultadu tanba, bainhira juíz ida mak hetán valór ki’ik tebes, entaun konfiansa povu nian ba Tribunál oinsá, impaktu sosiál maka’as, ho nune’e mak juís sira-nia servisu ne’e lahanesan ho funsionáriu baibain.
“Konkorente sira-ne’ebé la pasa iha teste ne’e tanba rekrutamentu ba STJ ne’e iha ema na’in-neen (6) husi kandidatu na’in-32 mak kompete, iha fali Tribunál Rekursu iha konkorente na’in-24 mak kompete ba vaga sia (9) iha Tribunál Rekursu,” nia dehan.
Tuir nia, konkorente balun ne’ebé la pasa iha vaga STJ hein atu tuir fali teste ba vaga Tribunál Rekursu. Maibé karik konkorente sira la pasa hotu iha vaga rua ne’e sira nafatin ezerse sira, nia funsaun hanesan juízes iha Tribunál Primeira Instánsia Dili.
Jornalista : Alexandra da Costa
Editór : Cancio Ximenes
