Konstrusaun salaun multi-funsaun Odomau atinje 33%
BOBONARU, 23 Outubru 2026 (TATOLI) — Konstrusaun salaun multi-funsaun iha Suku Odomau, Postu Administrativu Maliana, Munisípiu Bobonaru, atinje ona progresu fíziku 33%.
Kompaña implementadór Alvorese Unipessoal Lda garante katak obra ne’e sei remata iha Dezembru 2026, tuir prazu kontratu.
Enjineiru husi Kompaña Alvorese Unipessoal Lda, Sidonio Soares Moniz, informa katak konstrusaun ne’e hahú iha Juñu 2026.
“Agora dadaun projetu atinje ona 33%. Ami sei garante kualidade konstrusaun tuir rekezitu ne’ebé Governu fó mai ami. Traballadór sira kontinua servisu tuir orientasaun, no ami garante katak iha Dezembru ne’e konstrusaun bele remata 100% tuir kontratu,” nia dehan ba jornalista sira iha fatin konstrusaun, iha sexta-feira.
Xefe Suku Odomau, Sirilio Moniz Sirio Bere, esplika katak salaun ne’e sei sai fatin ba treinamentu, enkontru komunidade no atividade sira iha nivel suku ka postu administrativu, liuliu bainhira fatin enkontru seluk la disponivel.
Nia hateten katak proposta konstrusaun salaun ne’e submete ba Programa Dezenvolvimentu Integradu Munisipál (PDIM) 2026, tanba komunidade hasoru difikuldade atu hetan fatin adekuadu ba enkontru no atividade sira.
“Ha’u propoin projetu ne’e ba PDIM atu sai solusaun ba problema falta fatin enkontru. Bainhira fatin enkontru iha nivel postu administrativu la disponivel, ita bele uza salaun ne’e atu realiza atividade,” nia esplika.
Sirilio avalia katak konstrusaun ne’e lao di’ak, maski traballadór sira hasoru obstákulu balu durante implementasaun projetu.
Nia hein katak kompaña bele KONKLUI obra ne’e antes ka to’o iha prazu kontratu iha Dezembru, no husu ba kompaña atu kontinua asegura kualidade konstrusaun.
Konstrusaun salaun multi-funsaun Suku Odomau ne’e implementa husi Kompaña Alvorese Unipessoal Lda, ho orsamentu totál $80,287.24, liuhosi PDIM 2026.
Jornalista: Sergio da Cruz
Editór: Maria Auxiliadora
