Governu aprova rejime jurídiku ba utilizasaun pagamentu eletróniku
DILI, 28 Outubru 2026 (TATOLI) – Governu aprova projetu Dekretu-Lei kona-ba Rejime Jurídiku ba Utilizasaun Instrumentu Pagamentu Eletróniku iha Ezersísiu Atividade Ekonómika, ne’ebé aprezenta husi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, no Governadór Banku Sentrál Timor-Leste (BCTL, sigla iha lian portugés), Hélder Lopes.
Sekretáriu Estadu Komunikasaun Sosiál, Expedito Dias Ximenes, hatete diploma ne’e estabelese obrigasaun ba operadór atividade ekonómika atu disponibiliza no aseita instrumentu pagamentu eletróniku, ho objetivu atu promove efisiénsia, seguransa, transparénsia no rastreabilidade tranzasaun, nune’e mós dezenvolvimentu no utilizasaun sistema pagamentu nasionál.
Tuir nia, rejime ne’e abranje operadór atividade ekonómika nian iha territóriu nasionál, fornesedór servisu pagamentu nian sira ne’ebé hetan autorizasaun husi BCTL, no mós Administrasaun Públika no entidade públika sira seluk, fó exesaun ba vendedór ambulante sira no ba atividade sira ne’ebé hala’o iha área remota sira ne’ebé laiha kondisaun téknika, teknolójika ka infraestrutura ne’ebé bele uza instrumentu sira-ne’e.
Nia subliña katak operadór sira ne’ebé inklui ona iha períodu fulan neen hodi adapta ho obrigasaun foun sira ne’e, tanba diploma ne’e tama iha vigór iha loron dahuluk fulan tuirmai hafoin nia publikasaun.
“Ita agora moris iha era dijitál, Governu hakarak atu fasilita no dezenvolve sistema pagamentu eletróniku iha ita-nia país. Nune’e, Governu husu ba operadór komersiál sira atu fó opsaun pagamentu ba kliente sira bainhira sira sosa sasán iha loja ka sentru komersiál”, Expedito Dias Ximenes hatete.
Nia esplika katak husi dekretu-lei iha opsaun rua ne’ebé operadór komersiál sira tenke disponibiliza. Primeiru, kliente bele selu liuhusi sistema pagamentu eletróniku, hanesan uza kartaun. Segundu, kliente bele selu ho osan cash ka osan fíziku.
Governu husu ba operadór komersiál sira atu labele obriga kliente selu ho osan fíziku de’it, ka obriga sira atu uza pagamentu eletróniku de’it. Importante mak atu fó opsaun rua ne’e, hodi kliente bele hili métodu pagamentu ne’ebé sira hakarak uza.
Tanba ne’e, Ezekutivu aprova dekretu-lei ida atu garante katak operadór komersiál sira disponibiliza sistema pagamentu eletróniku no pagamentu ho osan fíziku, hodi fó liberdade ba kliente sira atu hili.
Notísia relevante: PM Xanana lansa TI-FAST no TuQR hodi moderniza sistema pagamentu dijitál
Jornalista: Arminda Fonseca
Editora: Maria Auxiliadora
