Agrikultura Bobonaru prepara fini batar tonelada lima atu distribui ba agrikultór sira
BOBONARU, 28 Outubru 2026 (TATOLI) – Diresaun Servisu Munisipál Agrikultura (DSMA) Bobonaru prepara fini batar tonelada lima atu distribui ba postu administrativu haat, hodi apoia agrikultór sira iha atividade kuda batar.
Xefe Departamentu Estensaun Agríkola DSMA Munisípiu Bobonaru, Joaninha de Jesus, hatete katak distribuisaun fini batar ba agrikultór sira iha postu administrativu Bobonaru no Lolotoe hahú ona iha semana kotuk ho kuantidade totál tonelada tolu.
“Iha Munisípiu Bobonaru ita iha tonelada ualu. Ba postu Kailaku, Atabae, Balibó no Maliana ita seidauk halo distribuisaun, ita sei rai hela iha armazein, tanba rai seidauk udan, ne’ebé sira halo preparasaun rai, husik udan tau lai mak ita halo distribuisaun”, nia informa ba jornalista sira, kuarta-feira ne’e.
Alende fini batar, DSMA mós apoia agrikultór sira ho serbisu fila rai gratuita, liuliu ba família sira ne’ebé laiha kapasidade finanseira atu selu serbisu ne’e.
“Ita tama ona preparasaun rai, agora ita apoia ona fila rai, ita apoia mós fila rai gratuita ba sira ne’ebé kbiit laiha, sira ne’ebé presiza tebes tulun husi Governu. Entaun, ita apoia sira ho mina gratuita, sira ne’ebé kbiit iha, sira na’in enxe mina”, nia realsa.
Notísia relevante: Governu apoia fini batar tonelada 20 ba agrikultór Bobonaro
Iha parte distribuisaun fini hare, Joaninha de Jesus hatete katak prosesu ne’e seidauk hahú tanba diresaun nasionál foin foti amostra fini atu halo teste iha laboratóriu, atu asegura katak fini ne’ebé sei sosa no distribui ba agrikultór sira kumpre kualidade ne’ebé presiza.
Maski nune’e, DSMA sei kontinua prepara apoiu seluk ba agrikultór sira, inklui adubu orgániku no pestisida, ne’ebé sei distribui iha faze kultivu.
Iha área asisténsia téknika, Joaninha de Jesus hateten katak estensionista sira koloka ona iha suku atu fó orientasaun ba agrikultór sira kona-ba prátika agríkola di’ak. Maibé, limitasaun rekursu umanu, transporte no lojístika halo atendimentu tékniku iha suku balun seidauk efetivu.
“Maibé, sira nafatin iha ne’ebá, bainhira agrikultór sira presiza kontaktu sira ba fó asisténsia teknika kona-ba prátika agrikultura di’ak”, Joaninha dehan.
Nia konsidera katak apoiu ne’ebé Governu fó ba agrikultór sira tenke akompaña ho mudansa mentalidade no vontade atu aplika koñesimentu tékniku, hodi garante sustentabilidade produsaun agríkola.
“Karik ami la bá iha tempu ruma, agrikultór sira bele kontinua aplika informasaun ne’ebé estensionista sira fahe ona. Se iha buat ne’ebé seidauk komprende, bele kontaktu ami atu hetan asisténsia téknika”, nia salienta.
Tanba ne’e, Joaninha husu agrikultór sira atu koopera ho estensionista sira no aplika orientasaun téknika ne’ebé hetan, hodi aumenta produsaun no asegura sustentabilidade agrikultura iha Mmunisípiu Bobonaru
Notísia relevante: PAM Bobonaro husu agrikultór hasa’e produsaun agrikola responde ba PME
Jornalista: Sergio da Cruz
Editora: Maria Auxiliadora
