Xanana propoin orsamentu ba infraestrutura millaun $326,5 atu kria investimentu
DILI, 10 Novembru 2027 (TATOLI)—Primeiru-Ministru, Kay Rala Xanana Gusmão, hateten Governu propoin orsamentu ba setór infraestrutura millaun $326,5 atu kria investimentu no asesibilidade ba populasaun liuliu iha área remota.
Deklarasaun ne’e Primeiru-Ministru, Kay Rala Xanana Gusmão, hato’o hodi resposta intervensaun husi deputadas sira iha diskusaun OJE 2027 iha faze jeneralidade loron daruak nian iha Parlamentu Nasionál.
“Infraestrutura bázika ne’e mak hanesan estrada, ponte, eletrisidade no bee-moos. Ita temi bázika tanba buat hirak ne’e mak laiha entaun dezenvolvimentu iha setór seluk mós paradu,” Xefe Governu relata iha diskusaun OJE 2027, ohin.
Xanana hateten, Governu iha hanoin atu mellora dezenvolvimentu ba estrada nasionál, urbana no rurál ne’e la’ós atu gasta osan de’it maibé atu kria investimentu hodi fó apoiu ba populasaun sira iha área rurál.
“Ita temi edukasaun loos duni sei falta eskola, kona-ba saúde mós sei falta klínika, ho ida-ne’e mak bainhira ita-nia infraestrutura bázika tenke dezenvolve to’o iha área remota,” Xanana deklara.
Durante ne’e, ferik-katuas sira labele halo movimentu ba-mai tanba estrada ladi’ak, maibé fatin hira-ne’ebé kondisaun estrada di’ak ne’e Governu kontinua hari’i klínika no eskola hodi fasilita asesibilidade ba komunidade.
“Bazeia ba avaliasaun servisu ne’ebé ami halo iha tinan 2024 to’o 2025 kuaze identifika buat fasilidade barak mak seidauk halo, tanba ne’e sira nafatin esforsu atu implementa hodi haree ba problema sosiál, saúde, edukasaun no mós asesu ba merkadu,” nia hateten.
PN komsidera Governu laiha planu di’ak ba setór infraestrutura
Antes ne’e, Deputada husi bankada PLP, Hermenegilda Laurentina halo intervensaun katak Governu aloka orsamentu barak ba setór infraestrutura maibé laiha planu konkretu.
“Ida-ne’e ha’u dehan tanba Governu ida agora halo alargamentu liuliu sobu fasilidade públiku sira, ida-ne’e signifika ita gasta osan hodi konstrui hafoin sobu fali no aloka foun fali osan planu ba foun,” Deputada ne’e deklara.
Nia hatutan, kuaze obra balun mak konstrui direta husi planu Governu Konstitusionál da-sia (9IX0 nian maibé ikus sobu fila-fali, signifika Governu ne’e laiha jestaun no planu ne’ebé mak di’ak atu dezenvolve rai ida-ne’e.
Jornalista : Alexandra da Costa
Editór : Cancio Ximenes
