PNTL Uatukarbau treina estudante na’in-80 ba serimónia hasa’e bandeira 28 Novembru

VIKEKE, 20 Novembru 2026 (TATOLI)—Polísia Nasionál Timor-Leste (PNTL), liuhusi Eskuadra Postu Administrativu Uatukarbau, Munisípiu Vikeke, hahú fó formasaun ba estudante na’in-80 hosi Eskola Ensinu Sekundáriu Jerál Uatukarbau atu prepara sira ba serimónia hasa’e bandeira nasionál iha Komemorasaun Aniversária 51 Proklamasaun Independénsia Timor-Leste, 28 Novembru 2026.
Komandante Eskuadra PNTL Uatukarbau, Inspetór Asistente Polísia Paulo Pinto, hateten katak formasaun ne’e hahú ona durante semana rua atu asegura estudante sira iha kapasidade no preparasaun adekuada hodi partisipa iha serimónia hasa’e bandeira, ne’ebé sei realiza iha Postu Administrativu Uatukarbau.
“Kona-ba Selebrasaun Aniversária 51 Proklamasaun Independénsia iha Postu Administrativu Uatukarbau, ami hahú ona fó formasaun durante semana rua atu estudante sira bele prepara an ho di’ak. Loron ne’e nu’udár loron importante ba nasaun Timor-Leste, tanba ne’e ita presiza kapasita joven sira atu bele hala’o serimónia hasa’e bandeira ho di’ak,” Paulo Pinto dehan ba TATOLI, iha Postu Administrativa Uatukarbau, Sesta ne’e.
Nia esplika katak formasaun ba ekipa korpu isár bandeira ne’e hala’o dala rua iha kada loron. Formasaun dahuluk hala’o iha dadeer, no depoiz estudante sira fila bá uma atu deskansa, kontinua fali iha lorokraik.
“Formasaun ba ekipa korpu isár bandeira ne’ebé ami prepara ne’e la’o di’ak tebes. Kada loron ami fó formasaun dala rua. Iha dadeer ami hanorin estudante sira, depoiz sira fila bá uma atu deskansa, no iha lorokraik ami kontinua fó formasaun. Atividade ne’e sei kontinua to’o loron 26-27 Novembru, no iha loron 28 Novembru estudante sira sei partisipa diretamente iha kampu serimónia,” nia akresenta.
Paulo Pinto mós relata katak estudante hamutuk na’in-80 mak partisipa iha formasaun ne’e. Ba tinan ida-ne’e, Komemorasaun Aniversáriu 28 Novembru iha Postu Administrativu Uatukarbau sei realiza iha Suku Loi-Ulu.
Iha parte seluk, Xefe Suku Loi-Ulu, Celestinho de Fátima Monteiro, hateten katak komunidade iha suku ne’e hahú ona preparasaun ba serimónia hasa’e bandeira, inklui prepara kampu serimónia, ai-riin bandeira no fatin atu simu konvidadu sira.
“Preparasaun ba Komemorasaun Loron 28 Novembru tinan ida-ne’e, ami mak sai uma-na’in ba serimónia hasa’e bandeira. Tanba ne’e, ami hahú ona prepara kampu, ai-riin bandeira no fatin atu simu konvidadu sira. Atividade seluk laiha, tanba ami foka de’it ba serimónia hasa’e bandeira,” nia relata.
Celestinho dehan katak Komemorasaun 28 Novembru nu’udár loron importante ba povu Timor-Leste atu hanoin filafali luta no sakrifísiu ne’ebé hala’o hodi hetan independénsia. Tanba ne’e, autoridade sira sei mobiliza komunidade atu partisipa iha serimónia hasa’e bandeira.
Entretantu, Munisípiu Vikeke aloka orsamentu hamutuk US$1.000 ba Postu Administrativu Uatukarbau hodi suporta realizasaun serimónia Komemorasaun 28 Novembru ne’ebé sei hala’o iha Suku Loi-Ulu.
Kontestu
Proklamasaun Independénsia Timor-Leste hala’o iha 28 Novembru 1975, bainhira Frente Revolucionária de Timor-Leste Independente (FRETILIN) proklama independénsia nasaun ne’e, ho Francisco Xavier do Amaral nu’udár Prezidente dahuluk Repúblika Demokrátika Timor-Leste.
Data istórika ne’e sai marku importante ida iha luta povu Timor-Leste ba autodeterminasaun no independénsia. Depoiz restaurasaun independénsia iha 20 Maiu 2002, loron 28 Novembru kontinua selebra nu’udár Loron Proklamasaun Independénsia. Iha tinan 2026, Timor-Leste komemora aniversária ba dala 51 husi proklamasaun ne’e.
Klik notísia relevante sira iha kraik hodi lee:
- Istória Proklamasaun Independénsia Timor-Leste: Esplika istória Proklamasaun Independénsia Timor-Leste iha 28 Novembru 1975, inklui papél FRETILIN no Prezidente dahuluk Repúblika Demokrátika Timor-Leste, Francisco Xavier do Amaral.
- Komemorasaun Aniversáriu ba Dala 51 Proklamasaun Independénsia Timor-Leste. Aprezenta programa ofisiál ba Komemorasaun Aniversária 51 Proklamasaun Independénsia Timor-Leste, ne’ebé hala’o hosi 23 to’o 29 Novembru 2026.
- Timor-Leste Selebra Aniversáriu ba Dala 50 Proklamasaun Independénsia. Fó informasaun kona-ba Selebrasaun Aniversáriu ba-50 Proklamasaun Independénsia iha 28 Novembru 2025, inklui realizasaun serimónia iha nivel nasionál no munisipál.
Jornalista: Vitorino Lopes da Costa
Editór: Xisto Freitas da Piedade

