OEKUSI, 27 Outubru 2025 (TATOLI) – Programa Nasionál Dezenvolvimentu Suku (PNDS) Rejiaun Administrativa Espesiál Oekusi Ambeno (RAEOA), simu ona despaixu husi Ministériu Administrasaun Estatál (MAE) ho rekomendasaun katak, iha loron 31 Outubru 2025, projetu PNDS regulár 2025 nian tenke konkluídu.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
Diretór PNDS Oekusi, João Evaristo Bobo, hateten katak, iha 2025 ne’e PNDS Oekusi ezekuta projetu 24 implementa iha suku 18 inklui projetu adisionál iha rua, sei entrega iha Dezembru 2025, tanba nia transferénsia verba iha loron 23 Setembru fulan kotuk, tan ne’e, PNDS ezekuta iha períodu fulan tolu tenku finaliza.
“Projetu hot-hotu iha Oekusi ita sei konklui iha loron 31 Outubru 2025, tuir despaixu Sua-selénsia Ministru Administrasaun Estatál nian, katak antes tama inísiu Novembru projetu hot-hotu iha oekusi tenke remata ona, ne’ebé projetu sira-nia progresu to’o agora atinje ona 70% ba leten, hein atu kompleta de’it serbisu ki’ik balun,” nia hateten ba jornalista sira iha Oekusi, ohin.
Nia garante katak, sei kumpre despaixu husi MAE nian, tanba ne’e antes ne’e parte PNDS hala’o ona enkontru ofisiál ho fornesedór sira inklui traballadór sira, atu selera serbisu.
“Nu’udar funsionáriu PNDS hanesan tékniku implementadór iha baze, ami garante katak sei konklui iha loron determinasaun 31 Outubru, se karik la konsege finaliza, ne’e sei fila-fali ba desizaun MAE nian maibé ami nafatin esforsa atu kumpre no tenke remata duni,” nia promete.
Notísia relevante:Autoridade Bene-Ufe Nítibe espera PNDS Oekusi aselera konstrusaun EBF Bítila
Entretantu, projetu 24 ne’e kabe ba suku 18 mak hanesan iha sub-rejiaun Nítibe, suku Ban-Afi halo reabilitasaun estrada iha aldeia Hautefo no aldeia Kuanobe, iha suku Bene-Ufe halo konstrusaun irrigasaun iha aldeia Manán, no reabilita edifísiu ba eskola primária.
Iha suku Lela-Ufe halo reabilitasaun ba estrada rurál iha aldeia Mahata, suku Suni-Ufe halo reabilitasaun estrada rurál iha aldeia Kabana no reabilita kapela iha aldeia Oélnanoe, suku Usitako, halo konstrusaun foun edifísiu morru hale’u eskola, no konstrusaun morru hale’u kapela iha aldeia Nítibe.
Iha sub-rejiaun Oésilo suku Bobometo halo reabilitasaun estrada rurál iha aldeia Oénoah, suku Usitaqueno halo reabilitasaun estrada rurál iha aldeia Níbin, iha suku Usitasa’e halo reabilitasaun edifisiu kapela iha aldeia Buqui.
Notísia relevante:PNDS Oekusi aprova projetu rua hodi implementa iha suku Monemeko no Kutete
Iha sub-rejiaun Pante Makasar, suku Bobokase halo reabilitasaun estrada rurál iha aldeia Fatubijae, no aldeia Nusla’o halo konstrusaun morru protesaun ba edifísiu kapela. Iha suku Costa halo reabilitasaun estrada rurál iha aldeia Sanane, suku Cunha halo reabilitasaun edifísiu eskola primária iha aldeia Noafafo.
Iha suku Lalisuk halo reabilitasaun estrada iha aldeia Banoko, suku Lifau halo reabilitasaun estrada iha aldeia Oémolo, suku Naimeko halo reabilitasaun estrada iha aldeia Noque no reabilita mós kapela, suku Nípani halo reabilitasaun estrada rurál iha aldeia Bausiu, iha suku Taiboko halo reabilitasaun iha estrada rurál iha aldeia Hauboni.
Iha sub-rejiaun Pássabe, suku Abani halo reabilitasaun estrada iha aldeia Pássabe, suku Malelat halo reabilitasaun edifísiu postu saúde Malelat no halo mós konstrusaun foun ida.
“Tinan ne’e maioria estrada rurál no ho edifikasaun kapela ho eskola sira no sala maternidade ida de’it konstrui iha suku Malelat sub-rejiaun Pássabe,” nia informa.
Notísia relevante: https://tatoli.tl/2025/04/09/pa-raeoa-orienta-empreza-sira-atu-nahe-estrada-rural-ho-simentu/
Jornalista: Abílio Elo Nini
Editór: Rafael Ximenes de A. Belo
