DILI (ANTIL)—Atu partisipa Eleisaun Parlamentar iha tinan ida ne’e, Organizasaun Juventude Partidu- CNRT (OJP-CNRT) oras ne’e dadaun konsege monta ona nia estrutura iha munisipiu to’o aldeia hamutuk ema 16.150.
“Iha tinan ida liu ba ami konsege monta ona ami nia estrutura iha munisipiu sanulu resin tolu, kada munisipiu ida ami tau ema nain sanulu, munisipiu sanulu resin tolu ami kobre hotu ona,” Sekretáriu Executivu OJP-CNRT Nasionál Arlindo Pinto informa ba ANTIL via telephone Kuarta (01/03/2017).
Alende estrutura munisipiu nian, OJP-CNRT mos monta nia ema hodi tau iha estrutura nivel postu-administrativu ne’ebe ho ema nain 10 iha postu-administrativu 65, inklu ema nain 30 ne’ebe mak tuur iha estrutura nivel suku ne’ebe kompleta ona iha suku kuaze 300 hosi total suku 442. Nune’e mos nain 10 ne’ebe tuur iha estrutura kada aldeia ne’ebe OJP-CNRT rejista ona aldeia 4,147.
“Ita haree hosi pursentu hosi nivel munisipiu to’o aldeia estruktura OJP-CNRT ami monta ona kuaze pursentu 70 iha teritoriu Timor laran tomak,” Arlindo relata.
Haree ba numeru estrutura ne’ebé mak montadu ona bele dehan katak, iha munisipiu sanulu resin tolu OJP-CNRT iha ona nia estrutura hamutuk ema nain 130.
OJP-CNRT nu’udar organizasaun massa ne’ebé kompostu hosi juventude sira ne’ebé hili hamahan án iha Partidu CNRT nian laran.
Jornalista: Manuel Pinto / Editor: Gantry Meilana
