Dili, (Tatoli) – Komisaun Nasionál ba Eleisaun (Comissão Nacional de Eleicão-CNE) entrega ofisialmente rezultadu provizóriu apuramentu nasionál ba Tribunál Rekursu (TR) atu bele anunsia.
Hafoin CNE halo publikasaun ba rezultadu verifikasaun dadus iha Sabadu (25/03/2017), tuku 18:30 Otl, nune’e, Segunda (27/03/2017) ohin, orgaun eleisaun ofisialmente entrega akta finál provizóriu ba Tribunál Rekursu atu anúnsia hafoin submete ba Prezidente Repúblika, Taur Matan Ruak atu promulga.
“CNE haruka akta provizóriu sira hosi rejultadu finál eleisaun ba tribunál, akta finál provizóriu ba rezultadu eleisaun prezidensiál” informa Prezidente CNE, Alcino Barris
Rezultadu apuramentu nasionál hatudu, kandidatu Francisco Guterres “Lu-Olo” sai klasifikadu dahuluk ho totál votu 295.048 ho 57, 1%. Entretantu, Antonio da Conceição ho votu 167.794 ho 32,5%.
Kandidatu sira seluk hanesan, José Luis Guterres ho votu 13.513 ho 2,6%. José Antonio de Jesus das Neves ho votu 11.663 ho 2,3%. Luis Alves Tilman ho votu 11.125 ho 2,2%. Antonio Maheir Lopes ho votu 9.102 ho 1,8%. Maria Angela Freitas da Silva ho votu 4.353 ho 0,8% no Amorin Vieira ho totál votu hamutuk 4.283 ho 0,8%.
Nune’e, totál votu nulo hamutuk 8.989 ho 1,70%. Totál votu branku hamutuk 2.911 ho 0,55%. Totál votu reklamadu zero ho 0%. Totál votu rejeitadu hamutuk 32 ho 0,01%. Totál votu válidu hamutuk 516.881 ho 97,74%.
Tasa partisipasaun ho 71,16%. Totál eleitór partisipante sira hamutuk 528.813 no totál eleitór rejistadu hamutuk 743.150. Entretantu, totál akta apuradu hamutuk 696 ho 100,00%.
Jornalista: Zezito Silva / Editor: Gantry Meilana
