DILI, (TATOLI)- Fos importasaun ne’ebe povu Timor-Leste konsumu durante ne’e, lori rendementu diak ba governu tamba iha tinan 2016, reseita ne’ebe tama hosi importasaun fos nian hamutuk US$ 1,525,569.20.
Alende reseita hosi fos importasaun, governu mos simu reseita hanesan hosi fos lokal ho montate US$ 127,979.99.
Administradór Sentru Lojístika Nasionál (SLN), Ministériu Komérsiu Indústria no Ambiente (MKIA), Nívio Magalhães, ba TATOLI foin lalais ne’e informa intervensaun merkadu ne’ebé SLN hala’o ne’e iha munisípiu 12 exeptu Oecusse.
“Bainhira SLN halo intervensaun direta nia presu dólar 11, sé indireta liuhusi emprezáriu sira sosa ne’e, nia presu depende ba distánsia munisípiu nian. Hanesan Munisípiu Manatutu nia presu lahanesan iha Kovalima,” katak Nívio.
Nia hatutan sosa foos produtu lokál husi emprezáriu sira ne’e, direta iha armazein SLN nian iha munisípiu.
“Iha aileu sira (emprezáriu sira) sosa dólar 8, fa’an ba dólar 11, Ainaru, sosa iha ami dólar 7 no bá fa’an fali dólar 11, Baukau sosa dólar 8 no fa’an dólar 11. Bobonaru sosa dólar 7, fa’an dólar 11, Kovalima sosa dólar 7, fa’an dólar 11, depende ba distánsia,” nia dehan.
Prosesu sosa ne’e, antes empreza sira transfere osan iha Banku Nasionál Ultramarinu maibé SLN loke ona númeru rekening foun iha Banku Nasionál Komérsiu Timor-Leste (BNKTL) iha 2017 hodi tranfere osan, depois lori resibu banku nia ba armazein SLN hafoin pasa hodi foti foos.
Jornalista: Maria Auxiliadora / Editor: Gantry Meilana
