DILI (TATOLI) –Implementasaun Eko-Turizmu Baze Komunitaria (ETBK) ne’ebe durante ne’e halao hosi Ministeriu Turizmu, Arte no Kultura tenki komunidade mak tenki sai nia nain.
Atu habelar informasaun, halibur no fo idea oinsa dezemvolve Eko-turizmu Baze Komunitária, Ministériu Turizmu, Arte no Kultura (MTAK) liu hosi Diresaun Nasionál Marketing Turizmu no Relasaun Internasionál (DNMTRI), realiza workshop loron ida, Tersa (28/3/2017), iha Sentru Konvensaun Dili.
Direitor Jeral Turizmu, Aquilino Cairo dehan dezenvolvimentu ba área turizmu, persiza produtu ne’ebé iha kualidade no komunidade mak tenke sai nain ba dezenvolvimentu rasik.
“Maluk sira iha Díli atu halo sira nia marketing maibé falta konesimentu no laiha fundu, ne’e duni papel MTAK atu bele promove kualker asaun konkretu ne’ebé komunidade sira harii ona,” dehan Aquilino iha sesaun workshop nian.
Workshop ho tema Merkadoria Eko-Turizmu Baze Komunitária, halao ho modelu halo diskusaun no sharing informasaun hosi parte setór privadu, akadémika, ministériu relevantes no sentru formasaun sira.
“Entidade hotu halibur malu iha ne’e, atu fó idéia ba malu, oinsa ita dezenvolve ita nia ekoturizmu baze komunitária Timor-Leste, no problema bot ida ita nia EBK atu asesu ba merkadu,” esplika José Quintas.
Implementasaun ba programa Eko-Turizmu Baze Komunitaria ne’e nia lalaok projetu hetan apóiu husi Organizasaun Mundiál Turizmu nian, iha item balun hanesan workshop nasional ne’ebé hare liuba merkadoria, website para atu promove ne’ebé ho kualidade diak.
“Liuhusi programa ida ne’e sei estabelese brosura própriu ba EBK ne’ebé ho kalidade diak ona tamba kulia konaba merkadoria, ita labele promove buat ida ho kualidade ho diak,” dehan José Quintas.
Jornalista: Julia Chatarina / Editor: Gantry Meilana
